کۆبوونەوەی هاوپەیمانی بەڕێوەبردنی دەوڵەت لەبارەی بڕیارەکانی دادگای فیدڕاڵی دوادەخرێت

ئاڤا نیوز

هەرچەندە بڕیاربوو شەوی ڕابردوو هاوپەیمانی بەڕێوەبردنی دەوڵەت کۆببێتەوە و نیگەرانییەکان لەبارەی بڕیاری ڕاگرتنی کارکردن بە سێ یاسا لەلایەن دادگای فیدڕاڵییەوە تاوتوێ بکات، بەڵام بەمەبەستی دەرفەت بۆ دادگا بۆ یەکلاییکردنەوەی ئەو بابەتە، کۆبوونەوەکە دواخراوە.

وێنە گەورەکە: ئەنجوومەنی باڵای دادوەری دەڵێت یاساکانی لێبوردنی گشتی، باری کەسی و گەڕانەوەی موڵک بۆ خاوەنەکانیان تائێستا لە ڕۆژنامەی وەقائیع بڵاونەکراونەتەوە و نەکەوتوونەتە بواری جێبەجێکردنەوە، بەهۆیەش ناکرێت فەرمانی سالارییان بۆ ڕاگرتنی کارپێکردنیان دەربچێت، بەڵام دادگای فیدڕاڵی جەخت دەکاتەوە کە بڕیارەکەی دەستوورییە و دەبێت هەموو دەسەڵاتەکان پێوەی پابەند بن.

زانیاریی بەدەستهاتوو: ڕۆژنامەی شەرقلئەوست لە سەرچاوەیەکی هاوپەیمانی بەڕێوەبردنی دەوڵەت بڵاویکردەوە، کۆبوونەوەی شەوی ڕابردوو لایەنە پێکهێنەرەکانی حکومەت بەمەبەستی دەرفەتدان بە دادگای فیدڕاڵی دواخراوە تا چارەسەرێک بۆ ئەو فەرمانە سالارییەی بدۆزێتەوە کە بۆ ڕاگرتنی کارکردن بە سێ یاسا دەریکردووە.

بەوتەی ئەو سەرچاوەیە، ئێستا لایەنەکان کار بۆ چارەسەری ئەو ناکۆکییە کەم وێنەیە دەکەن کە بەهۆی سێ یاساکە لەنێوان ئەنجوومەنی باڵای دادوەری و دادگای فیدڕاڵی ڕوویداوە، لایەنەکان بەگشتی و چوارچێوەی هەماهەنگیش بەتایبەتی دەیانەوێت چارەسەرێکی خێرا بۆ ئەو ناکۆکییە بدۆزنەوە کە بۆ خوێندنەوەی دەستوور دروستبووە.