بەهۆی خانەنشینبوونی پارێزگاری هەڵەبجە و جێگرەکەی دابەشکردنی مووچەی 70 فەرمانبەر ڕاگیراوە

ئاڤا نیوز

 

بەهۆی خانەنشینبوونی پارێزگاری هەڵەبجە و جێگرەکەی، کێشە بۆ دابەشکردنی مووچەی 70 فەرمانبەر لە بینای پارێزگای شارەکە دروست بووە، تاکە چارەسەری یاساییش بۆ گرفتەکە دیاریکردنی جێگرێکە بۆ ڕایی کردنی کارەکان.

 

وێنە گەورەکە: دوای خانەنشینبوونی پارێزگار و جێگرەکەی، نزیکەی مانگێکە پارێزگای هەڵەبجە لە بۆشایی یاساییدایە و کاروباری هاونیشتمانیان ڕاگیراوە. دوای بڵاوبوونەوەی لیستی مووچەی مانگی یەک بڕیارە ئەمڕۆ فەرمانبەرانی وەزارەتی ناوخۆ مووچە وەربگرن،  بەڵام بەهۆی نەبوونی واژۆی پارێزگارەوە مووچەی کارمەندانی بینای پارێزگا ڕاگیراوە.

 

زانیاریی تایبەت: بەپێی بەدواداچوونی ئاڤا میدیا کە لە چەند سەرچاوەیەکی ناو پارێزگاوە زانیاریی دەستکەوتووە، فەرمانبەرانی ناو بینای پارێزگا کە ژمارەیان 70 کەسە ئەمڕۆ نەیانتوانیوە مووچە وەربگرن.

 

چارەسەرەکان: لە کاتی نەمانی پارێزگاردا یەکێک لە جێگرەکانی کاروبارەکان بەڕێدەکەن، بەڵام ئێستا پارێزگای هەڵەبجە جێگریشی نەماوە، لەم حاڵەتەدا دوو ڕێگا هەیە: یان ئەوەیە وەزارەتی ناوخۆ نووسراو بۆ ئەنجوومەنی وەزیران دەکات و واژۆ لەسەر کەسێک دەکات کە وەک جێگرەوە کاروباری هاونیشتمانیان و کارمەندانی ناو پارێزگا ڕایی دەکات تائەوکاتەی پارێزگارێکی نوێ دادەنرێت، یان ئەوەیە پارێزگارێکی نوێ دادەنرێت و وەزارەتی ناوخۆ نووسراو بۆ ئەنجوومەنی وەزیران دەکات، ئەویش نووسراو بۆ سەرۆکایەتیی هەرێمی کوردستان دەکات و لەوێ مەرسومی بۆ دەردەچێت و دەبێتە پارێزگار.

 

زانیاریی زیاتر: تائێستا چاوەکان لەسەر نوخشە ناسیح، قائیمقامی ئێستای هەڵەبجەیە ببێتە جێگرەوەی ئازاد تۆفیق، پارێزگاری خانەنشینکراوی هەڵەبجە.