155 خێزانی دیکەی چەکدارانی داعش لە کەمپی هۆلەوە بۆ عێراق گەڕێنرانەوە

 

ئاڤا نیوز

پرۆسەی گەڕانەوەی خێزان و منداڵانی چەکدارانی داعش لە کەمپی هۆل بۆ عێراق بەردەوامە و لەو چوارچێوەیەش ئەمڕۆ 155 خێزانی دیکە لە کەمپەکەوە ڕەوانەی عێراق کرانەوە.

وێنە گەورەکە: کەمپی هۆل لە ڕۆژئاوای کوردستان، یەکێکە لەو شوێنە مەترسیدارانەی کە مەترسی سەرهەڵدانەوەی داعشی لێدەکرێت، ئێستا نزیکەی 42 هەزار کەسی تێدایە و لە 42 وڵاتی جیهانەوە نیشتەجێی ئەو کەمپەن.

زانیاریی بەدەستهاتوو: بە گوێرەی ئاژانسەکانی هەواڵ لە ڕۆژئاوای کوردستان، ئەمڕۆ یەکشەممە 155 خێزانی دیکەی عێراقی کە لە 569 کەس پێکهاتوون، گەڕێنرانەوە عێراق.

ئەوەی پێویستە بیزانیت: لەماوەی ئەمساڵدا ئەمە سێیەم کاروانی گەڕانەوەی خێزان و منداڵانی چەکدارانی داعشە لە کەمپی هۆلەوە بۆ عێراق، لە ڕابردوودا لە ڕێگەی دوو کاروانەوە، کاروانی یەکەم لە 715 کەس و کاروانی دووەمیش 578 کەس گەڕێنرابوونەوە.

ئەمەش بزانە: ئەو کەسوکارانەى چەکدارانى داعش دوای گەڕاندنەوەیان بۆ عێراق، دەگوازرێنەوە کەمپى جەدعە لە شارى موسڵ بۆ ئەوەى شیاندنەوەیان بۆ بکرێت، بەرلەوەى بگەڕێنرێنەوە شوێنێ نیشتەجێبوونی پێشووى خۆیان.

باکگراوند: کەمپى هۆل دەکەوێتە شارى حەسەکەى ڕۆژئاواى کوردستان و لەژێر دەسەڵاتى هێزەکانى هەسەدە دایە ئەو عێراقییانەی گەڕێنراونەتەوە، کەسوکارى ئەو چەکدارانەى داعشن کە کوژراون یان دەستگیرکراون.