ئاگربەستی غەززە کێشەی تێکەوت

ئاڤا نیوز

بزووتنەوەی حەماس ئاڵوگۆڕی بارمتە و دیلەکان لەگەڵ ئیسرائیل بۆ کاتێکی نادیار ڕادەگرێت، هۆکارەکەیشی بۆ پابەندنەبوونی ئیسرائیل بە ڕێککەوتنی ئاگربەست دەگەڕێنێتەوە. ئیسرائیلیش پێداگری لەسەر جێبەجێکردنی ئاگربەست دەکات.

لێدوانی فەرمی: ئەبو عوبەیدە، وتەبێژی کەتائیبی قەسام کە باڵی سەربازیی حەماسە، لە بەیاننامەیەکدا ڕایگەیاند:

٠ ئازادکردنی بارمتە ئیسرائیلییەکان کە بڕیاربوو ڕۆژی شەممەی داهاتوو 15-2- 2025 بکرێت، تا کاتێکی نادیار دوادەخرێت.

٠ دووپاتی دەکەینەوە پابەندین بە ڕێککەوتنی ئاگربەست تاوەکو ئەو کاتەی ئیسرائیل پابەند بێت بە بڕگەکانەوە.

هۆکارە زانراوەکان: ئەبو عوبەیدە دەڵێت لە ماوەی سێ هەفتەی ڕابردوودا بەوردی چاودێری پێشێلکارییەکانی ئیسرائیل و پابەندنەبوون بە مەرجەکانی ڕێککەوتنەکەیان کردووە، کە بریتین لە دواخستنی گەڕانەوەی ئاوارەکان بۆ باکووری غەززە، تۆپباران و تەقەکردن لە هاووڵاتیان لە ناوچە جیاوازەکانی غەززە، ڕێگەنەدان بە چوونەژوورەوەی هاوکارییە مرۆییەکان بە هەموو جۆرەکانییەوە وەک ئەوەی لەسەری ڕێککەوتوون.


بۆچوونی بەرامبەر: نووسینگەی بنیامین نەتانیاهۆ، سەرۆکوەزیرانی ئیسرائیل ڕایگەیاند، پێداگری لەسەر جێبەجێکردنی ڕێککەوتنی ئاگربەست دەکەین و هەر پێشێلکارییەک بەجددی وەردەگرین.


باکگراوند: بەپێی مەرجەکانی ڕێککەوتنی ئاگربەستی نێوان حەماس و ئیسرائیل کە قۆناغی یەکەمی لە 19-1-2025 کەوتە بواری جێبەجێکردنەوە، دەبووایە 33 بارمتەی ئیسرائیلی ئازاد بکرێن بەڵام تەنیا 16 یان ئازادکراون و 17 یان ماون و ئیسرائیل ئەڵێ لەو 17 بارمتەیە 8 یان مردوون، لەبەرامبەردا نزیکەی هەزار و 900 زیندانی کە زۆربەیان فەڵەستینی بوون لەلایەن ئیسرائیل ئازادکراون.


ئەمەش بزانە: لەکۆی 251 بارمتەی ئیسرائیل، ئێستا 73 کەسیان لە غەززە ماونەتەوە، لەو ژمارەیە سوپای ئیسرائیل دەڵێت  34 کەسیان کوژراون.