مەسرور بارزانی لەگەڵ ژمارەیەک لە سەرۆک و سەرکردەی وڵاتان کۆدەبێتەوە

ئاڤا نیوز

 

مەسرور بارزانی، سەرۆکوەزیرانی هەرێمی کوردستان لە ئیماراتە و هاوشان لەگەڵ سەرۆکی 30 وڵات و 140 سەرۆکوەزیرانی دیکەی وڵاتان لە لووتکەی جیهانی حکومەتەکان، دیدگای خۆیان بۆ حوکمڕانی دەخەنەڕوو. 

 

چیرۆکی سەرەکی: مەسرور بارزانی و شاندێکی هەرێمی کوردستان، ئەمڕۆ لە لووتکەی حکومەتەکان لە دوبەی، ژمارەیەک دیدار و کۆبوونەوەی گرنگ لەگەڵ سەرۆک و سەرکردەی وڵاتان ئەنجام دەدەن. 

 

زانیاریی زیاتر: قوباد تاڵەبانی جێگری سەرۆکوەزیران، ساسان عەونی، وەزیری شارەوانی، ئومێد سەباح سەرۆکی دیوانی ئەنجوومەنی وەزیران و و ئامانج رەحیم سکرتێری ئەنجوومەنی وەزیران یاوەریی سەرۆکوەزیران دەکەن.

 

ئەوەی پێویستە بیزانیت: هەر ئەمڕۆ کاتژمێر 10:00 بەکاتی هەولێر، مەسرور بارزانی بە ناونیشابی ( تێپەڕاندنی ئاڵنگارییەکان و لەدەستنەدانی دەرفەتەکان) لە لووتکەکەدا بەشداریی پانێلێک دەکات، کە لەلایەن عەبدوڵلا لوتا، جێگری وەزیری کاروباری ئەنجوومەنی وەزیرانی ئیمارات ڕێکدەخرێت.

 

ئەمەش بزانە: لووتکەی جیهانی حکومەتەکان، کۆڕبەندێکی جیهانییە بۆ خستنەڕووی دیدگای فراوان بۆ ئاراستەکردنی داهاتووی حکومەتەکان، 30 سەرۆکی وڵاتان، 140 سەرۆکی حکومەتەکان، 80 ڕێکخراو و دامەزراوەی نێودەوڵەتیی و هەرێمی لەگەڵ ژمارەیەک بیرمەندی جیهانی و شەش هەزار کەس بەشدار دەبن، هەروەها ئەمساڵ دوازدەهەمین لووتکەیە رێکدەخرێت و بۆ چوارەمین ساڵیشە سەرۆکوەزیرانی هەرێمی کوردستان، مەسرور بارزانی لەپاڵ سەرکردەکانی جیهان لە لووتکەکەدا بەشدارە.