بۆ نوێكردنەوەی تۆماری باری شارستانی سوود لە داتاكانی دوایین سەرژمێریی گشتیی عێراق وەردەگیرێت

ئاڤا نیوز

لەپێناو سوودوەرگرتن لە داتا و زانیارییەكانی دوایین سەرژمێریی دانیشتووانی عێراق بۆ نوێكردنەوەی تۆماری باری شارستانی و كارتی نیشتمانیی هاوبەش، هەردوو حكومەتی هەرێمی كوردستان و حكومەتی فیدڕاڵ هەماهەنگی دەكەن بۆ بەیەكبەستنەوەی داتا ئەلیكترۆنییەكان و بەدیجیتاڵكردنیان.

چیرۆكی سەرەكی: سندووقی نەتەوەیەكگرتووەكان بۆ دانیشتووان (UNFPA) بە هاوبەشی لەگەڵ دەزگای ناوەندیی ئامار لە عێراق و دەستەی ئاماری هەرێمی كوردستان، لەچوارچێوەی هەنگاونان بەرەو بونیادنانی خزمەتگوزارییە دیجیتاڵییەكان، وۆركشۆپێكی تەكنیكی ئەنجامدا، تێیدا بەشداربووان ئاشنای شێوازەكانی تەكنەلۆژیای سەردەم كران لەپێناو بەدیجیتاڵكردنی داتا و زانیاریی هاونیشتمانیان و بەیەكبەستنەوەی سیستمی ئەلیكترۆنی.

ئەوەی پێویستە بیزانیت: دەزگای ناوەندی ئاماری سەر بە وەزارەتی پلاندانانی عێراق لەمانگی تشرینی دووەمی ساڵی ڕابردوو، سەرژمێریی گشتیی دانیشتووانی عێراقی ئەنجامدا، ئێستا بەڕێوەبەرایەتیی گشتیی ڕەگەزنامە و باری شارستانی سەر بە وەزارەتی ناوخۆی فیدڕاڵ، مەبەستیەتی سوود لە داتا و ئامارە نوێیەكانی سەرژمێریی دانیشتووان وەربگرێت بۆ ڕێكخستنەوەی تۆمارەكانی خۆی.

ڕاگەیێنراوی فەرمی: بەپێی ڕاگەیێنراوی دەستەی ئاماری هەرێمی كوردستان؛ سوودوەرگرتن لە سیستمی (CRVS)، پاڵپشت بە داتا و زانیارییەكانی پرۆسەی سەرژمێریی ساڵی ڕابردوو، و بەستنەوەی بە سیستمی تۆماری باری شارستانیی بەڕێوەبەرایەتییەكانی ڕەگەزنامەی گشتی، هەنگاوێكی گرنگ و پێویستە بۆ بەرەوپێشچوونی خزمەتگوزارییە دیجیتاڵییەكان، و بەستنەوەی بە سەرجەم ئەو بابەتانەی دیكە كە لەلایەن فەرمانگەی تەكنەلۆجیا و زانیاریی حكومەتی هەرێمی كوردستانەوە ئەنجامدراوە، لەنموونەی ئاپڵیكەیشنی (KRDPass) و پسوولەی ئەلیكترۆنیی دابەشكردنی خۆراك و چەندان خزمەتگوزاریی دیكەی ئەلیكترۆنی.