بۆ دەستپێکردنەوەی دەرماڵە 100 هەزارییەکە نووسراو بۆ بەغدا دەکرێت

ئاڤا نیوز

 

بڕیارە ئەم هەفتەیە وەزارەتی دارایی و ئابووریی هەرێمی کوردستان بۆ دووبارە گەڕاندنەوە و خەرجکردنەوەی ئەو دەرماڵە 100 هەزارییەی کە لە  خانەنشینانی کوردستان بڕا، نووسراوێک بۆ وەزارەتی دارایی عێراق بکات. 

 

وێنە گەورەکە:  لە مووچەی مانگی یەكی ئەمساڵی 2025 بڕی 100 هەزار دینار لە خانەنشینانی سەرتاسەری عێراق بە خانەنشنیانی هەرێمی كوردستانیشەوە بڕا،  کە پێشتر وەکو دەرماڵەی بژێوی خەرج دەکرا و لە ساڵی ڕابردووەوە خانەنشینانی کوردستانیش دەگرتەوە.

 

زانیاریی تایبەت: ئاڤا زانیویەتی بڕیارە ئەم هەفتەیە وەزارەتی دارایی و ئابووریی کوردستان نووسراو بۆ وەزارەتی دارایی عێراق بکات، دواتر دەکرێنە یەک پاکێج و بۆ نووسینگەی محەممەد شیاع سوودانی سەرۆکوەزیرانی عێراق دەنێردرێت، دەبێت ئەو واژۆی لەسەر بکات.

ئەوەی پێویستە بیزانیت: ئەو دەرماڵەیە ئەو خانەنشینانە دەگرێتەوە کە مووچەیان لە ملیۆنێک دینار کەمترە،  بە خەرجکردنی ئەو دەرماڵەیەش مووچەی هیچ خانەنشێنێک لە 600 هەزار دینار کەمتر نابێت. هەر کاتێکیش سوودانی واژۆی لەسەر دەستپێکردنەوەی دەرماڵەکە کرد، هی مانگەکانی ڕابردوو نافەوتێت و پێیان دەدرێتەوە.