هاوپەیمانیی ئۆپۆزیسیۆنی سووریا و دەستەی دانوستانکار هەڵدەوەشێنرێنەوە

 

 

ئاڤا نیوز

ئەحمەد شەرع، سەرۆککۆماری سووریا لەگەڵ 'هاوپەیمانیی نیشتیمانیی ئۆپۆزیسیۆنی سووریا' و 'دەستەی دانوستانکار' ڕێککەوت بۆ هەڵوەشاندنەوەیان.

وێنە گەورەکە: ڕۆژی سێشەممەی ڕابردوو، ئەحمەد شەرع لە کۆشکی شەعب لە دیمەشق، پێشوازیی لە هادی بەحرە، سەرۆکی هاوپەیمانیی نیشتیمانیی ئۆپۆزیسیۆنی سووریا و بەدر جامووس، سەرۆکی دەستەی دانوستانکار و شاندی یاوەریان کرد، بۆ ڕادەستکردنی فایلەکانی پەیوەست بە کاری ئەو دوو دامەزراوەیە وەک ئامادەکارییەک بۆ ڕاگەیاندنی هەڵوەشاندنەوەیان.

ڕاگەیێنراوی فەرمی: سەرۆکایەتی کۆماری سووریا لە بەیاننامەیەکەدا ڕایگەیاند: لەگەڵ ڕاگەیاندنی سەرکەوتنی شۆڕشی سووریا، کە بریتییە لە هەڵوەشاندنەوەی سەرجەم ئەو دامەزراوانەی کە لەکاتی شۆڕشدا سەریان هەڵداوە و تێکەڵکردنیان بە دامەزراوەکانی دەوڵەتەوە، هەردوو شاندەکە ئەو ئەرکەیان ڕادەستی دەوڵەتی سوریا کرد.

لەلایەکی دیکەوە: بەگوێرەی چەند سەرچاوەیەکی سووری، حکومەتی نوێی سووریا لیژنەی ئامادەکاریکردن بۆ "کۆنگرەی نیشتیمانی" پێکهێناوە کە لە پێنج پیاو و دوو ئافرەت پێکدێت، ڕۆژی چوارشەممە بەشێوەیەکی فەرمی ناوەکان ڕادەگەیێنرێت و لەگەڵ سەرجەم لایەنە سوورییەکان گفتوگۆ دەکەن پێش ڕاگەیاندنی "کۆنگرەی نیشتیمانی".

ئەوەی پێویستە بیزانیت: هاوپەیمانی نیشتمانیی هاوپەیمانییەکی سیاسییە لە ساڵی 2012 دامەزرا،  پێکهاتەی سیاسی و سەربازییەکانی ئۆپۆزسیۆنی سوریا لەخۆدەگرێت کە ئامانجی یەکخستنی هەوڵەکان بوو بۆ ڕووخاندنی ڕژێمی بەشار ئەسەد و پاراستنی یەکێتی سووریا و گەلەکەی و دامەزراندنی دەوڵەتێکی فرەیی و دیموکراسی و مەدەنی.

دەستەی دانوستانکاری سووری لە ئەنجامی کۆنفرانسی ڕیاز لە سعوودیە ساڵی 2015 دامەزرا و ئەرکەکەی سەرپەرشتیکردنی ڕاستەوخۆی پرۆسەی دانوستانەکان بوو لەگەڵ ڕژێمی سوریا لەو کاتەدا کە نەتەوە یەکگرتووەکان چاودێریی پرۆسەکەی دەکرد.