یونامی زانیاریی زیاتر لەبارەی دیدارەکەی سوودانی و ئەلحەسسان دەخاتەڕوو

 

ئاڤا نیوز

نێردەی نەتەوەیەکگرتووەکان لە عێراق لە ڕاگەیێنراوێکدا وردەکاری زیاتر لەبارەی ئەو دیدارەی نێوان سەرۆکوەزیرانی عێراق و سەرۆکی نێردەی یونامی دەخاتەڕوو کە نووسینگەی سەرۆکوەزیرانی عێراق ئاماژەی پێ نەکردووە.

چیرۆکی سەرەکی: ڕۆژی چوارشەممە، محەممەد شیاع سوودانی، سەرۆکوەزیرانی عێراق لە بەغدا پێشوازی لە د.محەممەد ئەلحەسسان، جێگری نوێنەری تایبەتی سکرتێری گشتی نەتەوە یەکگرتووەکان بۆ عێراق و سەرۆکی نێردەی یونامی کرد.

ڕاگەیێنراوی فەرمی: بەگوێرەی ڕاگەیێنراوەکەی یونامی، ئەلحەسسان کورتەیەکی سەبارەت بە سەردانەکەی بۆ دەوڵەتی کوێت و کۆبوونەوەی لەگەڵ ئەمیر و شازادەی جێنشینی ئەو وڵاتە بۆ سەرۆکوەزیرانی عێراق خستووەتەڕوو.

هاوکات باسی لە ئارەزووی کوێت کردووە بۆ بەهێزکردنی پەیوەندیی برایەتی لەنێوان هەردوو وڵاتی دراوسێدا و گێڕانەوەی متمانە لەسەر بنەمای رێزگرتن لە دراوسێیەتی باش و ڕێزگرتنی دوولایەنە و دروستکردنی پردی پەیوەندی هاوکاری بۆ خزمەتکردنی بەرژەوەندییەکانی هەردوو وڵات.

گۆشەیەکی دیکەی دیمەنەکە: بە گوێرەی ڕاگەیێنراوەکەی نووسینگەی سەرۆکوەزیرانی عێراق بەهیچ جۆرێک پرسی پەیوەندییەکانی نێوان کوێت و عێراق نەخراوەتەڕوو. بەڵکو لە ڕاگەیێنراوەکەدا ئەوە هاتووە:

- لە میانی دیدارەکەدا باسیان لە پەرەپێدانی هاریکاری نێوان عێراق و ڕێکخراوی نێودەوڵەتی کرد بۆ ڕووبەڕووبوونەوەی ئاستەنگەکان و گەیشتن بە ئامانجە هاوبەشەکان.

- دوایین پێشهاتەکانی گۆڕەپانی ناوچەکە تاوتوێ کرا و جەخت لەسەر گرنگی ڕۆڵی نەتەوە یەکگرتووەکان لە سڕینەوەی کاریگەرییەکانی جەنگ و یارمەتیدانی هەردوو گەلی فەڵەستین و لوبنان کرایەوە.

-  پێویستی هاوکاری و هەماهەنگی بۆ یارمەتیدانی سووریا بۆ ڕێکخستنی پرۆسەیەکی سیاسی گشتگیر کە بەشداری هەموو پێکهاتەکان و پاراستنی یەکپارچەیی خاکەکەی مسۆگەر بکات.