کارەبای سێ پارێزگای باشووری عێراق پچڕا

 

ئاڤا نیوز

بە هۆکارێکی نادیار، کوژانەوەی گشتیی "شەت داون" لە وێستگەکانی دابەشکردنی کارەبای باشوور ڕوویدا و بەهۆیەوە کارەبای هەرسێ پارێزگای بەسرە، زیقار و مەیسان کوژایەوە.

وێنە گەورەکە: لەم مانگەدا ئەمە جاری دووەمە کێشەی کوژانەوەی گشتی لە وێستگەکانی دابەشکردنی کارەبای باشوور ڕوودەدات و جاری پێشووش بەهەمان شێوە کارەبای هەرسێ پارێزگاکەی باشووری عێراق پچڕا.

زانیاریی بەدەستهاتوو: بە گوێرەی ئەو سەرچاوانەی قسەیان بۆ میدیای عێراق کردووە، ئەمڕۆ پێنجشەممە 2025-02-13، کارەبای پارێزگاکانی بەسرە، زیقار و مەیسان بە هۆکارێکی نادیار پچڕاوە.

لە لایەکی دیکەوە: سێشەممەی هەفتەی ڕابردوو بە هەمان شێوە کوژانەوەی گشتیی لە وێستگەکانی دابەشکردنی کارەبای باشوور ڕوویدا، ئەوکات وتەبێژی وەزارەتی کارەبای عێراق هۆکارەکەی بۆ کێشەیەکی تەکنیکی لە یەکێک لە وێستگەکانی بەرهەمهێناندا گەڕاندەوە.

ئەوەی پێویستە بیزانیت: "گەورەترین ئاستەنگەکانی بەردەم وەزارەتی کارەبای عێراق نەبوونی بڕی پێویستی سووتەمەنییە بۆ بەگەڕخستنی وێستگەکانی بەرهەمهێنانی کارەبا." ئەمە قسەی زیاد عەلی فازل، وەزیری کارەبای عێراق بوو لە کۆتایی مانگی ڕابردووی ئەمساڵ لە میانی بەڕێوەچوونی کۆنفرانسی وزەی عێراق لە بەغدا.