ئەندامێکی ئەنجوومەنی نوێنەرانی ئەمریکا قاسم ئەعرەجی بە پیاوی ئێران ناودەبات

ئاڤا نیوز

ئەندامێکی کۆمارییەکان لە ئەنجوومەنی نوێنەرانی ئەمریکا، ڕاوێژکاری ئاسایشی نیشتمانی عێراق بە بڵاوکەرەوەی "توندڕەوی مەزهەبیی و سەرکردەی گرووپێکی سەر بە ئێران" تۆمەتبار دەکات و هەوڵەکانیشی بۆ بەنگاربوونەوەی توندڕەوی بە "گاڵتەجاڕانە" ناودەبات.

چیرۆکی سەرەکی:  دوێنێ لە یادی ڕۆژی جیهانی بەرەنگاربوونەوەی توندڕەوی و توندوتیژیی، لە تۆڕی کۆمەڵایەتی ئێکس پەیامێکی بڵاوکردەوە و دەڵێت، "جەخت لە ئاشتی و پێکەوەژیان دەکەینەوە بۆ بوونیادنانی وڵاتێکی دوور لە توندڕەویی و رق و کینە".

لێدوانی فەرمی: جۆ ویڵسۆن، ئەندامی کۆمارییەکان لە ئەنجوومەنی نوێنەرانی ئەمریکا، لە تۆڕی کۆمەڵایەتی ئێکس، وەڵامی قاسم ئەعرەجی داوەتەوە و دەڵێت، "ئەمە گاڵتەجاڕی نییە، قاسم ئەعرەجی ڕاوێژکاری ئاسایشی نیشتمانی عێراق و سەرکردەی گرووپێکی سەر بە ئێران، کە هێرشیکردە سەر باڵیۆزخانەکەمان و بانگەشە بۆ توندڕەوی مەزهەبیی چەوت دەکات، ئێستا یادی ڕۆژی جیهانی بەرەنگاربوونەوەی توندڕەوی و توندوتیژیی دەکاتەوە".

ئەمەش بزانە: پێشتریش  جۆ ویڵسۆن، ئاماژەی بەوەکردبوو گرووپە چەکدارەکانی عێراق و ئێران مانگانە لەڕێگەی بانکی ڕافیدەینەوە "500 بۆ 600 ملیۆن دۆلار بە تاڵان دەبەن"، بۆیە داوایکردبوو توندترین فشار بخرێتە سەر عێراق، بۆ ڕاگرتنی ئەو پارە بردنە دەرەوەیە.