کۆبوونەوەکەی ترەمپ و پووتین لە سعودیە ئەنجام دەدرێت

ئاڤا نیوز

 

 

کۆبوونەوە چاوەڕوانکراوەکەی نێوان سەرۆکەکانی ڕووسیا و ئەمریکا بۆ کۆتاییهێنان بە جەنگی سێ ساڵەی ئۆکراینا و ڕووسیا، لە سعودیە ئەنجام دەدرێت.

 

وێنە گەورەکە: دوای چاوەڕوانییەکی زۆری جیهان بۆ کۆبوونەوەی نێوان دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا، دواجار پەیوەندیەکی تەلەفۆنی کۆتایی بەم چاوەڕوانییە هێنا، بڕیاریشە هەردوو سەرۆکی ئەمریکا و ڕووسیا بە بێ ڤۆلۆدیمێر زیلێنسکی، سەرۆکی ئۆکراینا کۆببنەوە.

 

لێدوانی فەرمی: دۆناڵد ترەمپ، سەرۆکی ئەمریکا لە کۆنگرەیەکی ڕۆژنامەوانیدا ڕایگەیاند: "لەگەڵ سەرۆک پووتین بڕیارمان داوە سەردانی وڵاتی یەکتر بکەین و یەکەم کۆبوونەوەمان بۆ کۆتاییهێنان بە جەنگی نێوان ئۆکراینا و ڕووسیا، لە پێناو کۆبوونەوەیەکی بەرهەمدار و گفتوگۆی ڕاشکاوانە لە سعودیە و بە بەشداریی محەممەد بن سەلمان، شازادەی جێنشینی سعودیە ئەنجام دەدرێت. 

 

لەلایەکی دیکەوە: دۆناڵد ترەمپ ڕەتیکردەوە بیانەوێت ڤۆلۆدیمێر زیلێنسکی، سەرۆکی ئۆکراینا دوور بخەنەوە لە کۆبوونەوەکان، بەڵام بۆ یەکەم کۆبوونەوەی سەرۆکەکان کە بڕیارە لە سعودیە ئەنجام بدرێت، بەشداری ناکات.