ئەمریکا دەست بە دەرکردنی کارمەندانی فیدراڵ دەکات

ئاڤا نیوز

ئیدارەی دۆناڵد ترەمپ، بە هاوکاریی لەگەڵ ئیلۆن مەسک، دەرکردنی فراوانی کارمەندانی فیدراڵیی دەستپێکردووە. ترەمپ دەیەوێت لەم ڕێگەیەوە بەهەدەردانی پارە کەم بکاتەوە.

وێنە گەورەکە: لە قۆناغی یەکەمدا، ئەو کارمەندانەی کە تازە وەرگیراون و هێشتا لە ژێر تاقیکردنەوەدان، دەردەکرێن. لەم چوارچێوەیەشدا نامەیەکی ئاگادارکردنەوە بۆ 160 کارمەندی وەزارەتی پەروەردە نێردراوە و تێیدا نووسراە بەردەوامیی کارکردنی ئەوان لەگەڵ بەرژەوەندیی گشتییدا تەریب نییە، بۆیە دەردەکرێن. ترەمپ پێشتریش چەندینجار ڕەخنەی لە وەزارەتی پەروەردە گرتووە و ویستی خۆی بۆ داخستنی وەزارەتەکە نیشان داوە. 

ئەوەی پێویستە بیزانیت: جگە لە وەزارەتی پەروەردە، دەرکردنی بەکۆمەڵ لە بەڕێوەبەرایەتیی بزنسە بچووکەکان، بەڕێوەبرایەتیی پشتیوانیی دارایی لە بەکاربەران، بەڕێوەبەرایەتیی هێزی مرۆیی و بەڕێوەبەرایەتیی خزمەتگوزارییە گشتییەکانیش هەبووە. 

 ئەمەش بزانە: ئیدارەی ترەمپ داوای لە سەرجەم باڵیۆزخانەکانی ئەمریکا لە سەرتاسەری جیهان کردووە تا خۆیان بۆ کەمکردنەوەی ژمارەی کارمەندانیان ئامادە بکەن.