ئەحمەد شەرع بانگهێشتی بەغدا دەکرێت

ئاڤا نیوز

جێگری سەرۆکوەزیران و  وەزیری دەرەوەی عێراق، ئاشکرایکرد، بەغدا هیچ مەرجێکی بۆ مامەڵەکردن لەگەڵ سەرکردایەتیی نوێی سووریا نییە، هاوکات لایەنە سیاسییەکانی عێراقیش لە گفتوگۆدان بۆ چەکداماڵینی هێزە چەکدارەکان.

لێدوانی فەرمی: فوئاد حوسێن، بە ئاژانسی فرانس 24ـی گوتووە،

- بانگهێشتی فەرمی ئاراستەی ئەسعەد شەیبانی، وەزیری دەرەوەی سووریا کراوە و لە داهاتوویەکی نزیکدا سەردانی بەغدا دەکات.

- بۆ بەشداریکردن لە لووتکەی وڵاتانی عەرەبی کە عێراق لە مانگی ئایاری داهاتوودا میوانداری دەکات، بانگهێشتنامەی فەرمی ئاراستەی سەرجەم سەرکردەکانی وڵاتانی عەرەبی دەکرێت، لەنێویاندا ئەحمەد شەرع، سەرۆکی سووریا بۆ قۆناغی ڕاگوزەری تێدایە.

- بڕیارەکانی ئەم دواییەی ئیدارەی نوێی ئەمریکا ئێرانی کردووەتە ئامانج نەک عێراق، دانوستانەکانی داهاتووش بۆ دیالۆگی ستراتیژی نێوان بەغدا و واشنتن لە ماوەی داهاتوودا لە پایتەختی ئەمریکا بەڕێوەدەچێت.

لەلایەکی دیکەوە: سەبارەت بە چەکداماڵینی هێزە چەکدارەکان، وەزیری دەرەوەی عێراق ئاماژەی بەوە کرد،  ئێستا گفتوگۆیەک لە نێوان لایەنە عێراقییەکان هەیە و ئەم دۆسیەیە کاتێک لە میدیاکانەوە بەم شێوەیەی ئێستا باس و ڕوماڵ دەکرێت، ئەوە خاڵی ئەرێنی گەورەیە بۆ کۆتاییهێنان بە دیاردەی چەک لە دەرەوەی ئیدارەی دەوڵەتدا.