لە عێراق هێزێکی چەکداریی نوێ بەناوی "بورهان" دادەمەزرێت

ئاڤا نیوز

 

لەکاتێکدا حکومەتی عێراق باس لە چەک داماڵینی هێزە چەکدارەکانی بەناو "بەرەی مقاوەمەی ئیسلامی" دەکات، نوجەبا دامەزراندنی پێکهاتەیەکی نوێی سەربازی ڕادەگەیێنێت.

 

وێنە گەورەکە: بەگوێرەی زانیاریی میدیاکانی عێراق، زیاتر لە 10 هەزار چەکدار لە دەرەوەی دەسەڵاتی فەرماندەی هێزە چەکدارەکانی عێراق کار دەکەن و پێداگرن لەسەر مانەوە لە دەرەوەی دامەزراوە فەرمییەکانی حکومەت، ئەمەش جگە لە دەستەی حەشدی شەعبی کە زیاتر لە 250 هەزار ئەندام لەخۆدەگرێت.

 

ڕاگەیێنراوی فەرمی:  لە بەیاننامەیەکدا بزووتنەوەی نوجەبا دامەزراوەیەکی سەربازیی تایبەتی لە ژێر ناوی "هێزی بورهان" ڕاگەیاند و دەڵێت، "ئەو هێزە چەکدارە چەندین سەربازی شەڕکەری مەشقپێکراو لەخۆدەگرێت".

 

زانیاریی زیاتر: بەپێی بەیاننامەکە ئەو هێزە بەمەبەستی ڕووبەڕووبونەوەی هێزەکانی ئەمریکا لەنێو خاکی عێراق و دەرەوە دامەزراوە.

 

ئەمەش بزانە: بزووتنەوەی نوجەبا کە ئەکرەم کەعبی، ئەمیندارییەتی دەکات، یەکێکە لە دیارترین گرووپە چەکدارەکانی عێراق، لە ساڵی 2013 دامەزراوە و نزیکەی هەشت هەزار ئەندامی هەیە، لەلایەن ئەمریکاوە وەک ڕێکخراوێکی تیرۆریستی ناوی دەبرێت و لە لیستی تیرۆردا پۆلێنکراوە.