مەسەدە لەبارەی "کۆنگرەى دیالۆگى نیشتمانى" داوایەک لە دەسەڵاتدارانی دیمەشق دەکات

ئاڤا نیوز

ئەنجوومەنی سووریای دیموکرات داوا لە دەسەڵاتدارانی سووریا دەکات، چاو بە پێکهێنانی لیژنەی ئامادەکاری بۆ کۆنگرەى دیالۆگى نیشتمانى بخشێننەوە، بە شێوەیەک کە خزمەت بە کۆنفرانسی دیالۆگی نیشتمانی بکات.

 

وێنە گەورەکە: ڕۆژی 12ی شوبات پێکهاتەی لیژنەیەکى حەوت کەسی بۆ  ئامادەکاریى کۆنگرەى دیالۆگى نیشتمانى سووریا بڵاوکرایەوە، بێ ئەوەی هیچ ئەندامێکی کوردی تێدابێت.

 

ڕاگەیێنراوی فەرمی: بە گوێرەی ڕاگەیێنراوی ئەنجوومەنی سووریای دیموکرات، ئەو لیژنەیەی پێکهێنراوە "نوێنەرایەتی سەرجەم پێکهاتە سووریاییەکان ناکات، هاوکات پەراوێزخستنێکی ڕوون و ئاشکرای هێزە سیاسی و کۆمەڵایەتی و نیشتمانییەکان هەیە، کە ڕێژەیەکی گەورە و بەرچاو لە پێکهاتەی کۆمەڵگەی سووریا پێکدەهێنن پەراوێزخستنیان پێشێلکارییەکی ئاشکرای بنەمای هاوبەشی نیشتمانییە.

 

لەلایەکی دیکەوە: لە پەراوێزی کۆنفرانسی پاریس لە 13ی شوبات کە تایبەت بوو بە سووریا بە بەشداریی 20 وڵات و ژمارەیەک ڕێکخراوی نێودەوڵەتی. ئیمانوئێل ماکرۆن، سەرۆکی فەرەنسا ستایشی کوردانی ڕۆژئاوای کوردستانی کرد. لە ڕاگەیێندراوی کۆنفرانسەکەشدا بە پێویست زانراوە هەموو لایەنەکان بەشداری لە کۆنگرەی دیالۆگی نیشتمانی لە سووریا بکەن.

 

ئەوەی پێویستە بیزانیت: ئەو لیژنە حەوت کەسییە بە بڕیارى ئەحمەد شەرع، سەرۆککۆمارى سووریا بۆ قۆناغى ڕاگوزەر پێکهێنراوە، کارى ئەو لیژنەیە ئامادەکارییە بۆ کۆنگرەى دیالۆگى نیشتمانیی لایەنەکان، وەک قۆناغى بەر لە هەڵبژاردن لە سووریا.