چارەنووسی دەیان ئەفسەر و بەرپرسی ڕژێمی ئەسەد لە عێراق ئاشکرا دەبێت

ئاڤا نیوز

 

ڕاپۆرتێکی ئەمریکی چارەنووسی نزیکەی 100 بەرپرس و ئەفسەری ڕژێمی بەشار ئەسەد کە پێشتر پەنایان بۆ عێراق بردووە ڕەتیانکردەوە بگەڕێنەوە بۆ وڵاتەکەیان ئاشکرا دەکات.

 

چیرۆکی سەرەکی:  لە حەوت و هەشتی کانونی یەکەمی ساڵی ڕابردوو لە ڕێگەی دەروازەی سنووریی بوکەمالەوە 2493 سەرباز و ئەفسەر و بەرپرسی ڕژێمی بەشار ئەسەد لە سووریاوە هاتنە نێو خاکی عێراق، دواتر لە 19-12-2024 فەرماندەیی ئۆپەراسیۆنە هاوبەشەکانی عێراق گەڕانەوەی هەزار و 905 ئەفسەر و کارمەندی سووریای ڕاگەیاند.

 

بڵاوکراوەی فەرمی: ڕاپۆرتەکە دەریدەخات، ئەو ئەفسەرانەی ڕەتیانکردەوە بگەڕێنەوە وڵاتەکەیان بە ڕێوشوێنی توندی ئەمنی لە ئەنبارەوە گواسترانەوە بۆ بەغدا، بەشێکیان بەرەو ڕووسیا و بیلاڕووس و دەوڵەتێکی کەنداو بەڕێکەوتن و لەو وڵاتانە جێگیربوون، بەشێکی دیکەیان بەسەر کۆمەڵگەیەکی نیشتەجێبوون لە بەغدا و  کەمپی ئەشرەف لە پارێزگای دیاله دابەشکران.

 

لێدوانی فەرمی: عومەر سەتار، شارەزا لە بواری سیاسی ڕایگەیاند: ئەو ئەفسەر و کارمەندە سوورییانەی ماونەتەوە لە عێراق، پەیوەندییان بە ژوورێکی ئۆپەراسیۆنەوە کردووە کە ئێران دوای ڕووخانی ئەسەد دایمەزراندووە بەمەبەستی چالاککردنی شانە نوستووەکانی دژی ئیدارەی نوێی سووریا.