بەرهەمی نێوخۆیی کوردستان هەناردەی ئەمریکا دەکرێت

ئاڤا نیوز

 

دوای هەناردەکردنی بەرهەمی نێوخۆیی کوردستان بۆ بەشێک لە وڵاتانی ئەوروپا و کەنداو، بڕیارە ئەم بەرهەمانە هەناردەی ئەمریکاش بکرێن.
 

بۆچی گرنگە؟ هەناردەکردنی ئەو بەرهەمانە و ساخکردنەوەیان لە بازاڕەکانی وڵاتانی دەرەوە، جووتیاران هاندەدات بەرهەمی باشتر و زیاتر بەرهەمبهێنن، دەبێتە هۆکارێکیش بۆ زیاتر ناساندنی بەرهەمی کشتوکاڵی بە وڵاتانی دەرەوە.

چیرۆکی سەرەکی: وەزارەتی بازرگانیی هەرێمی کوردستان و باربارا ئابێل، بەرپرسی پەیوەندییە ئابوورییەکانی ژووری بازرگانیی ئەمریکا، لە کۆبوونەوەیەکدا باسیان لە هەناردەکردنی بەرهەمە نێوخۆییەکانی هەرێمی کوردستان بۆ ئەو وڵاتە کردووە.

 

لێدوانی فەرمی: فەتحی مودەڕیس، ڕاوێژکاری پەیوەندییەکانی وەزارەتی بازرگانیی هەرێمی کوردستان بە ئاڤا نیوزی گوت: "سەرەتا لێکۆلینەوە دەکرێت لەبارەی ئەوەی بەبازاڕکردن بۆ دەرەوە چۆنە و تێچووەکەشی چەندە".

 

زانیاریی زیاتر: چەندین کۆمپانیای ئەمریکی لەڕێگەی ژووری بازرگانیی ئەمریکاوە داوایان کردووە پەیوەندی پیشەسازیی خۆراک و هەناردەکردنی بەروبوومەکانی هەرێمی کوردستان بۆ ئەمریکا پەرەی پێبدرێت.

باکگراوند: لە سەرەتای دەستبەکاربوونی کابینەی نۆ بە سەرۆکایەتیی سەرۆکوەزیران بارزانی، ساخکردنەوەی بەرهەمی نێوخۆ و هەناردەکردنیان بۆ دەرەوە یەکێک لە کارنامە سەرەکییەکان بووە، ئێستا بەرهەمی جووتیارانی کورد بۆ وڵاتانی کەنداو، ئەوروپا و بەریتانیا هەناردە دەکرێت.