ئەیرباس هێلیکۆپتەری سەربازیی بە عێراق دەفرۆشێت

ئاڤا نیوز

سەرۆکوەزیرانی عێراق و بەرپرسانی کۆمپانیای ئەیرباس بۆ هێلیکۆپتەر کۆبوونەوە و جەختیانکردەوە لەسەر پەلەکردن لە ڕادەستکردنی هێلیکۆپتەری سەربازیی بە عێراق.

ئەوەی پێویستە بیزانیت: ئەیلوولی ساڵی ڕابردوو بەغدا و ئەیرباس ڕێککەوتنێکیان واژۆکرد و بەگوێرەی ڕێککەوتنەکەش بڕیاربوو لە سەرەتای ئەمساڵدا، کۆمپانیاکە 14 هێلیکۆپتەر بۆ عێراق دروستبکات کە 12یان هێلیکۆپتەری سەربازیین.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاویکردەوە:

- محەممەد شیاع سوودانی، سەرۆکوەزیرانی عێراق لە میونشنی ئەڵمانیا، لەگەڵ ستیڤان تۆمی، جێگری بەڕێوەبەری جێبەجێکاری کۆمپانیای فڕۆکەوانی ئەیرباس کۆبووەوە، لە کۆبوونەوەکەشدا ڕاهێنان و نوێکردنەوەی سیستمی ئاسمانی عێراق بەگوێرەی ڕێککەوتنی نێوان هەردوولا تاوتوێکرا.

- لە کۆبوونەوەکەدا تاوتوێی ڕێککەوتنەکانیش کراوە بۆ دابینکردنی هێلیکۆپتەری سەربازیی و پەلەکردن لە جێبەجێکردنی بڕگەکانی ئەو ڕێککەوتنە.

- سەرۆکوەزیران جەختیکردەوە، بەغدا لەگەڵ هەموو کۆمپانیا جیهانییەکان کە خاوەن ئەزموون و ناوبانگێکی باشن هەماهەنگی دەکات و بۆ کارکردنیشیان لە عێراق هەموو ئاسانکارییەکیان بۆ دەکات.