مەیاحی: عێراق پێویستی بە 20 ساڵی دیکە هەیە بۆ ئەوەی گرفتی کارەبا چارەسەر بکات

 

ئاڤا نیوز

پارێزگاری واست ڕایدەگەیێنێت، لە عێراق شتێک نییە بەناوی کارەبای نیشتمانی و ئاماژە بۆ ئەوە دەکات بۆ چارەسەکردنی کێشەی کارەبا لە عێراق پێویستیان بە 20 دیکە هەیە و دەشڵێت عێراق نیوەی ئەو کارەبایە بەرهەم دەهێنێت کە پێویستیەتی.

وێنە گەورەکە: سەرەڕای ئەو بودجە زەبەلاحەی لە ماوەی 22 ساڵی ڕابردوو بۆ کەرتی کارەبا لە عێراق تەرخانکراوە، بەڵام تاوەکو ئێستا نەتوانراوە کێشەی کەمی پێدانی کارەبا بە هاووڵاتییان چارەسەر بکرێت.

لێدوانی ڕۆژنامەوانی: محەممەد جەمیل مەیاحی، پارێزگاری واست لە دیدارێکی ڕۆژنامەوانی لەگەڵ میدیای عێراق ڕایگەیاند: سیستمی کارەبا لە عێراق پێویستی بە بەڕێوەبردنێکی تەکنیکی هەیە، وەزارەتی کارەبا ژمارەیەکی زۆر لە شارەزایانی لەدەستداوە، تەنانەت شارەزا ڕاستەقینەکانیش پەراوێزخراون یانیش لە وەزارەت دووخراونەتەوە.

- شتێک نییە بەناوی کارەبای نیشتمانی، ئەگەر لە بەسرە کارەبا ببڕێت ئەوا لە هەموو عێراق کارەبا دەپچڕێت، لەلایەکی دیکە قەبارەی ئەو کارەبایەی بەفیڕۆ دەچێت دەگاتە 60%.

- بۆ چارەسەرکردنی کێشەی کارەبا لە عێراق پێویستیمان بە 20 ساڵی دیکە هەیە، بەڵام ئەگەر پەنا بۆ پلانی جێگرەوە ببرێت ڕەنگە زووتر چارەسەر ببێت، وەکو بەکارهێنانی وزەی خۆر، ڕاگرتنی ئەو بەهەدەردانەی لەسەر کارەبا هەیە.

- ئێستا عێراق پێویستی بە بەرهەمهێنانی 50 هەزار مێگاوات کارەبا هەیە، بەڵام 25 هەزار مێگاوات بەرهەم دەهێنێت، واتە 50% لە پێویستی خۆی کەمتر بەرهەم دەهێنێت.

ئەوەی پێویست بیزانیت: لەم مانگەدا لە دوو کاتی جیاواز کێشەی کوژانەوەی گشتی لە وێستگەکانی دابەشکردنی کارەبای پارێزگاکانی باشووری عێراق ڕوویدا و بەهۆیەوە کارەبای هەرسێ پارێزگای  بەسرە، زیقار و مەیسان پچڕا.