عێراق و هەرێمی کوردستان سیستمی ژمێریاری یەکگرتوو پەیڕەو دەکەن

 

ئاڤا نیوز

بۆ دوور کەوتنەوە لە سزا نێودەوڵەتییەکان، عێراق ناچار کراوە تا کۆتایی ساڵی داهاتوو سیستمی ژمێریاریی یەكگرتوو بۆ ڕێكخستنەوەی وەزیفەی گشتیی پەیڕەو بكات.

وێنە گەورەکە: عێراق بۆ ئەوەی لە سزا داراییەكانی ئەمریكا و بانکی نێودەوڵەتیی ڕزگاری ببێت، لەسەری پابەند كراوە تا ساڵی 2026، سیستمی ژمێریاریی یەكگرتوو لەسەر بنەمای پێوەرە نێودەوڵەتییەكان بۆ ڕێكخستنەوەی وەزیفەی گشتیی پەیڕەو بكات، بۆ ئەمەش هەردوو حكومەتی هەرێمی كوردستان و حكومەتی فیدڕاڵی هەماهەنگ دەبن و دەستیان بە كاری پێكەوەیی كردووە.

زانیاریی زیاتر: كۆمەڵگەی نێودەوڵەتی و ڕێكخراو و دامەزراوە نێودەوڵەتییەكان بۆ پرسی شەفافیەت و بەرەنگاربوونەوەی گەندەڵی، ژمارەیەك پڕەنسیپ و بنەمایان داڕشتووە كە پێویستە هەر حكومەتێك لە ئیدارەدانی دەوڵەت و ڕێكخستنی وەزیفەی گشتی لەبەرچاوی بگرێت، كە پەیوەستن بە بابەتەكانی سپیكردنەوەی پارە و تاوانە داراییەكان و هاوكاریكردنی ئەو حكومەتانەی كە بەلای ئەمریكا و هاوپەیمانەكانی، لە لیستی ڕەشن.

پێویستە چی بكرێت؟ 

عێراق و هەرێمی كوردستان لەڕووی وەزیفی و ئیدارییەوە پێویستە خۆیان لەگەڵ ئەم سیستمە بگونجێنن، لەڕێگەی جێبەجێكردنی شەفافیەت و دووركەوتنەوە لە سپیكردنەوەی پارە و چارەسەركردنی كێشە داراییەكان و كارئاسانی بۆ چاودێری نێودەوڵەتی لەسەر خەرجی و داهاتی عێراق و جووڵەی دارایی بانكە عێراقییەكان، ئەگینا بانكە عێراقییەكان جارێكی دیكە ڕووبەڕووی سزا داراییەكانی ئەمریكا دەبنەوە، ئەوەش دوای هەڕەشەكانی گەنجینەی ئەمریكا بە سزادانی 12 بانكی گەورەی عێراقی، لەسەرووی هەمووشیانەوە ڕەشید و ڕافیدەین.

ئەوەی پێویستە هەردوو حکومەت کاری لەسەر بکەن، ئەمەیە؛

یەكەم: ڕێكخستنەوەی پلە وەزیفییەكان کە پێویستی بە تەرخانكردنی پارە (تخصیص مالی) هەیە، ئەگەر لە خشتەی خەرجییەكانی بودجەی ساڵی 2025 زیادبكرێت و لە دانیشتنی پەرلەمان دەنگی لەسەر بدرێت، ئەوا هەر ئەمساڵ پلە وەزیفییەكان ڕێكدەخرێتەوە، ئەگینا دەكەوێتە ساڵی ئایندە.

دووەم: پێویستە هاووڵاتییان بزانن هاوتاكردن و ڕێكخستنەوەی میلاكات شتێك نییە بەغدا فەرزی بكات و هەرێمی كوردستان جێبەجێی بكات، بەڵكو دەبێت بەهەماهەنگی هەردوولایەن كاری لەسەر بكرێت، چونکە کێشەی ڕێكخستنەوەی میلاكات لە تەواوی عێراق هەیە.