لە عێراق زەنگی مەترسی قەیرانی کارەبا لێ دەدرێت

 

ئاڤا نیوز

عێراق لە کڕینی گاز و کارەبای ئێران بێبەش دەبێت و هاوینێکی سەخت و بێ کارەبایی چاوەڕوانی عێراقییەکان دەکات. 

چیرۆکی سەرەکی: سەرچاوەیەکی تایبەت بۆ ئاڤا میدیا ئاشکرای دەکات، ژمارەیەک کۆمپانیای ئێرانی بۆ ئەوەی لە سزاکانی ئەمریکا پارێزراو بن، لە عێراق کۆمپانیایان دامەزراندووە. بۆ ئەوەی گازی سروشتی لە ئێرانەوە دابین بکەن و وێستگەکانی کارەبای لە عێراق پێ بەگەڕ بخەن، ئینجا هەر خۆیان پارەی کڕینی گاز و کارەباکە ببنەوە ئێران، بەڵام ئێستا ئەوە لای ئەمریکا ئاشکرا بووە و ترەمپ فەرمانی دەرکردووە هەوڵەکان خێرا بکرێن ئێران بەتەواوی لە سیستەمی دارایی عێراق داببڕێت.

زانیاریی زیاتر: ئەو قەیرانە لە ئێستاوە دەستی پێکردووە، پێنجشەممەی ڕابردوو، بەهۆی پچڕانی کارەبا لە بەسڕە و چەند پارێزگایەکی دیکەی باشووری عێراق، 35 بیر لە کێڵگەکانی نەوت کوژانەوە و بەهۆیەوە بەرهەمهێنانی 57 هەزار بەرمیل نەوتی ڕۆژانە کەمی کرد. هاوکات هێڵی 400ـی میسان – واستیش پەکی کەوتووە.

لە لایەکی دیکەوە:  قەیرانی دابینکردنی گازی سروشتی لە نێوخۆی ئێرانیش کێشەی کارەبای لە وڵاتەکە دروست کردووە. کە بەهۆی ئەو قەیرانەوە، لە 24 پارێزگای ئێران قوتابخانە و فەرمانگەی حکومی لە ڕۆژی سێشەممەی ڕابردووەوە داخراون، جێگری سەرۆکی کۆمپانیای دابەشکردنی کارەبای ئێرانیش دەڵێت، قەیرانی سووتەمەنی تەواوی ئەمساڵ بەردەوام دەبێت.