نزیکەی سێ هەزار کرێکاری بیانی لە عێراق دیپۆرتی وڵاتەکانیان دەکرێنەوە

 

ئاڤا نیوز

بەڕێوەبەرایەتی نشینگە لە وەزارەتی ناوخۆ، دەستگیرکردنی نزیکەی سێ هەزار کرێکاری سەرپێچیکاری بیانی و دیپۆرتکردنەوەیان بۆ دەرەوەی عێراق ڕادەگەیێنێت کە زۆرترینیان هەڵگری ڕەگەزنامەی سووری، بەنگلادیشی و پاکستانی بوونە.

وێنە گەورەکە: بەگوێرەی ئامارە فەرمییەکان لە عێراق 43 هەزار کرێکاری بیانی هەن کە مۆڵەتی کارکردنیان هەیە، لەو ژمارەیەش بەشێکی زۆریان مۆڵەتی ساڵانەیان نوێ نەکردووەتەوە و ئێستاش لە وڵاتەکەدا کاردەکەن.

لێدوانی فەرمی: عەمید ئەحمەد تۆفان، بەڕێوەبەری نیشینگە لە وەزارەتی ناوخۆ بە ئاژانسی فەرمی عێراقی ڕاگەیاند: وەزارەتی کار و کاروباری کۆمەڵایەتی پرسی کاری بیانی لە عێراق ڕێکخستووە بە دانانی ڕێژەی 50% بە بەراورد بە ڕێژەیەکی هاوشێوە لە کرێکاری عێراقی لە هەر پڕۆژەیەک یان شوێنی کاردا، بەڵام بەهۆی سەرپێچییەکانەوە پێمانوایە ئەم ڕێژەیە بە شێوەیەکی دروست لە هەموو شوێنەکانی کاردا جێبەجێ ناکرێت.

- پێشتر وادەیەکمان دانابوو بۆ کرێکارانی بیانی کە لە 2024-12-31 کۆتایی دەهات و وادەکەمان بۆ 15 ڕۆژ درێژکردەوە بۆ چارەسەرکردن و یەکلاییکردنەوەی دۆخەکانیان. دوای ئەوە هەڵمەتێکمان دەستپێکرد دژی ئەو کرێکارە بیانیانەی کە سەرپێچی مانەوەی نیشتەجێبوونیان کردبوو، لە ئەنجامدا دوو هەزار و 865 سەرپێچیکار دەستگیرکران و دیپۆرتی دەرەوەی عێراق کرانەوە.

- ساڵی ڕابردوو تەنیا لە بەغدا 20 هەزار و 598 سەرپێچیکار دیپۆرت کراونەتەوە، هاوکات ژمارەکە بۆ هەموو عێراق گەیشتووەتە زیاتر لە 36 هەزار کەس.

- پێشێلکارییەکانیش چەند جۆرێکن لەوانە هاتنی نایاسایی، سەرپێچی مەرجەکان، تێپەڕبوونی ماوەی دیاریکراو بۆ مانەوەی کرێکاری بیانی، زۆربەی سەرپێچیکارانیش هاووڵاتیانی پاکستان، بەنگلادیش و سووریا بوونە.