حکومەتی عێراق: هیچ گۆڕانکارییەک لە وادەی کشانەوەی هێزەکانی ئەمریکا نەکراوە

ئاڤا نیوز

 

وتەبێژی فەرمی حکومەتی عێراق ڕایدەگەیێنێت، هیچ گۆڕانکارییەک لە وادەی کشانەوەی هێزەکانی هاوپەیمانی نێودەوڵەتی له عێراق ڕووینەداوە.

 

وێنە گەورەکە: مانگی ئەیلوولی ساڵی ڕابردوو، عێراق و ئەمریکا ڕێککەوتن لەسەر کۆتاییهێنان بە ئەرکی هاوپەیمانی نێودەوڵەتی بۆ بەرەنگاربوونەوەی داعش لە عێراق لە کۆتایی مانگی ئەیلوولی 2025.

 

لێدوانی فەرمی: باسم عەوادی، وتەبێژی فەرمی حکومەتی عێراق بە ڕۆژنامەی سەباحی ڕاگەیاند: ئەو وادەیەی لەلایەن لیژنەی باڵای سەربازیی لە نێوان عێراق و هێزەکانی هاوپەیمانی نێودەوڵەتیی ڕێککەوتوونی لەسەر کراوە، وەک خۆیەتی و هیچ گۆڕانکارییەکی بەسەردا نەهاتووە.

 

لەلایەکی دیکەوە: پەیوەست بە پەیوەندییەکان لەگەڵ سووریا عەوادی ڕایگەیاند، عێراق و حکومەتەکەی لە پێش هەموویانەوە بوون لە گرنگیدان بە دۆخی نوێی سووریا، لە بەغداشەوە ئاماژەگەلێک هەبوون بۆ پێشوازی و ئامادەیی بۆ هاوکاریکردنیان، گرنگترینیان بڕیاری جددی عێراق بووە بۆ دەستوەرنەدان لە کاروباری ناوخۆی سووریا.

 

- ئەسعەد شەیبانی، وەزیری دەرەوەی سووریا سەردانی بەغدا دەکات بۆ پتەوکردنی پەیوەندییە دیپلۆماسییەکانی نێوان هەردوو وڵاتی دراوسێ.
  
-هەموو ئامادەکارییەکان بۆ بەڕێوەچوونی لووتکەی عەرەبی لە بەغدا بەپێی پلان و بەرنامە بەڕێوەدەچن.