جۆ ویڵسۆن: هەژموونی ئێران لە عێراق ناتوانێت بەردەوام بێت

ئاڤا نیوز

ئەندامێکی کۆمارییەکان لە ئەنجوومەنی نوێنەرانی ئەمریکا وەڵامی نووری مالیکی دەداتەوە و دەڵێت، هەژموونی ئێران لە عێراق چیتر ناتوانێت بەردەوام بێت.

 

چیرۆکی سەرەکی: 15ی ئەم مانگە نووری مالیکی، سەرۆکی هاوپەیمانی دەوڵەتی یاسا و سەرۆکوەزیرانی پێشووتری عێراق لە کۆبوونەوەیەکی جەماوەری حیزبەکەیدا لە بەغدا ڕایگەیاند، ئەمڕۆ پشێویی جیهانی گرتووەتەوە و ڕووبەڕووبوونەوە لەنێوان دەوڵەتان و کۆمەڵگاکان ڕوویداوە، بۆیە "دەبێت ئاگاداری مەترسی ئەو پێشوویانە لە کۆمەڵگاکەمان بین بەتایبەت دوای ئەوەی لە غەززە، لوبنان و سووریا ڕوویدا". داواش دەکات حکومەت و گەل دژی هەموو ئەوانە بوەستنەوە کە یاسا دەشکێنن و پێشیلی دەکەن.

 

لێدوانی فەرمی: جۆ ویڵسۆن، ئەندامی کۆمارییەکان لە ئەنجوومەنی نوێنەرانی ئەمریکا، لە تۆڕی کۆمەڵایەتی ئێکس، وەڵامی مالیکی داوەتەوە بە داردەستی ئێران ناوی بردووە، دەشڵێت، "چیتر هەژموونی ئێران ناتوانێت بەردەوام بێت، ئازادی بۆ عێراق لە ئێران".

 

- چەند هەفتەیەکی دیکە ئەمریکا ماوەی لێخۆشبوونی عێراق بۆ کڕینی کارەبا و گازی ئێران هەڵدەوەشێنێتەوە. 
- ڕێگری دەکرێت هاوکارییە داراییەکانی عێراق بۆ گرووپەکانی نزیک لە ئێران تەرخان بکرێت. 

 

ئەمەش بزانە: پێشتریش جۆ ویڵسۆن، ئاماژەی بەوەکردبوو گرووپە چەکدارەکانی عێراق و ئێران مانگانە لەڕێگەی بانکی ڕافیدەینەوە، "500 بۆ 600 ملیۆن دۆلار بە تاڵان دەبەن"، بۆیە داوایکردبوو توندترین فشار بخرێتە سەر عێراق، بۆ ڕاگرتنی ئەو پارە بردنە دەرەوەیە.