لە گوندی شەناغەی کەرکووک سوپای عێراق ڕێگری لە کێڵانی زەوی جووتیارانی کورد دەکات

ئاڤا نیوز

 

سوپای عێراق هێزی ڕەوانەی گوندی شەناغە لە سنووری پارێزگای کەرکووک کردووە و ڕێگە نادەن جووتیارانی ئەو ناوچەیە زەوییەکانیان بکێڵن. 

 

زانیاریی پەیامنێر: دیار محەممەد، پەیامنێری ئاڤا میدیا ڕایگەیاند، سوپای عێراق هێزێکی زۆری بردووەتە سەر زەوی جووتیارانی کورد لە گوندی شەناغە لە سنووری کەرکووک، ڕێگری لە جووتیارانی کورد دەکەن زەوییەکانیان بکێڵن و ڕێگە نادەن کاری چاندن بکەن. 

 

زانیاریی زیاتر: لە کاتێکدا لە کۆی 500 پارچە زەوی لە گوندی شەناغە، 498 پارچە زەوی بە نووسراوی فەرمانگەی کشتوکاڵی کەرکووک هیچ کێشەیەکی زەوی و زاری لەسەر نییە، واتە بەو نووسراوە فەرمییە دەتوانن کاری کشتوکاڵی لەسەر زەوییەکانیان بکە بەڵام سوپا ڕێگە نادات.

 

لەلایەکی دیکەوە: پێشتر شاخەوان عەبدوڵڵا، جێگری دووەمی سەرۆکی پەرلەمانی عێراق ڕایگەیاند ، دوای بڕیارەکەی دادگای فیدڕاڵی، هیچ بەربەستێکی دیکە لەبەردەم گەڕانەوەی ماف بۆ خاوەن زەوییە ڕەسەنەکان بەگوێرەی یاسای گەڕانەوەی زەوی بۆ خاوەنە ڕەسەنەکانیان نەماوە و خەڵکی کەرکووک، دووبز، پردێ، لەیلان، تازە، سەرگەڕان، داقوق، دووزخورماتوو، خانەقین و مەندەلی دەتوانن کاری خۆیان لەسەر زەوییەکانیان بکەن.