وەزیری نەوتی عێراق: هەفتەی داهاتوودا هەناردەکردنی نەوتی کوردستان دەستپێدەکاتەوە

ئاڤا نیوز

وەزیری نەوتی عێراق ڕایدەگەیێنێت، لە ماوەی هەفتەی داهاتوودا هەناردەکردنی نەوت لە هەرێمی کوردستان دەستپێدەکاتەوە، ئاماژەی بەوەشکرد، بەغدا ڕۆژانە 300 هەزار بەرمیل لە هەرێم وەردەگرێت.

 

وێنە گەورەکە: بە مەبەستی دەستپێکردنەوەی هەناردەی نەوتی هەرێمی کوردستان و دیاریکردنی خەرجی بەرهەمهێنان و گواستنەوەی نەوت، ڕۆژی 2ی شوبات پەرلەمانی عێراق هەمواری یاسای بودجەی پەسەندکرد.

 

لێدوانی ڕۆژنامەوانی: دووشەممە 17-2-2025، حەیان عەبدولغەنی، وەزیری نەوتی عێراق بە ڕۆژنامەنووسانی ڕاگەیاند: لە ماوەی هەفتەی داهاتوودا هەناردەکردنی نەوت لە هەرێمی کوردستانەوە دەستپێدەکاتەوە.

 

- بە گوتەی وەزیری نەوتی عێراق، بەغدا ڕۆژانە 300 هەزار بەرمیل لە هەرێمی کوردستان وەردەگرێت.

 

ئەمەش بزانە: بەگوێرەی ڕێککەوتنی نێوان هەولێر و بەغدا، هەناردەی نەوتی هەرێمی کوردستان ڕادەستی کۆمپانیای سۆمۆ دەکرێت و وەزارەتی دارایی فیدراڵ بۆ تێچووی دەرهێنان و گواستنەوەی هەر بەرمیلێک نەوت 16 دۆلار خەرج دەکات. تاوەکو تێچووەکەی لەلایەن ئەو کۆمپانیا ڕاوێژکارییە دیاریدەکرێت.

 

لەلایەکی دیکەوە: هەر ئەمڕۆ کەمال محەممەد، وەزیری سامانە سروشتییەكان بەوەكالەت بە ئاڤا میدیای ڕاگەیاندبوو: بە ئەگەرێكی زۆرەوە تا كۆتایی مانگی 3 ـی ئەمساڵ، هەناردەكردنەوەی نەوتی هەرێمی كوردستان دەستپێدەكاتەوە.