یاسای حەشدی شەعبی شەڕی سارد لە پەرلەمان دەنێتەوە

 

 

ئاڤا نیوز

ئەندامێکی چوارچێوەی هەماهەنگی ئاشکرایکرد، بەڕێوەچوونی دانیشتنی پەرلەمانی عێراق پەیوەستە بە پەسەندکردنی یاسای حەشدی شەعبییەوە، عامریش لەپەرلەمانەوە دڵنیایی لەپەسەنکردنی دەدات.

وێنە گەورەکە: دوای ئەوەی هێرشی چەکدارانی داعش بۆ سەر عێراق دەستیپێکرد، بە فتوای ئاینیی لە نەجەف ئەو گرووپە چەکدارییە دروستکرا، دواتر یاسای دەستەی حەشدی شەعبی بە زۆرینەی دەنگ لە 2016 پەسندکرا و هێزەکەی کرد بە هێزێکی یاسایی لە چوارچێوەی هێزە سەربازییەکانی عێراق.

لێدوانی فەرمی: عارف حەمامی پەرلەمانتاری عێراق لەچوارچێوەی هەماهەنگی ڕاگەیاند: زۆرینەی ئەندامانی پەرلەمان ئامادەی دانیشتنەکانی ئێستا و داهاتوو نابن، تاوەکو یاسای خانەنشینی حەشدی شەعبی نەکرێتە نێو بەرنامەی کاری پەرلەمان و دەنگی لەسەر نەدرێت.

لەلایەکی دیکەوە: لە میانی سەردانی بۆ پەرلەمانی عێراق، هادی عامری سکرتێری گشتی ڕێکخراوی بەدر دووپاتی کردەوە، سەرجەم ئاڵنگاریەکانی بەردەم یاسای حەشدی شەعبی چارەسەر دەکرێن و بە دڵنیاییەوە پەسەند دەکرێت، چونکە یاسایەکی گرنگە.

ئەمەش بزانە: بەهۆی ئامادەنەبوونی زۆربەی پەرلەمانتارە شیعەکان بەتایبەتی ئەندامانی چوارچێوەی هەماهەنگی، هەردوو دانیشتنی یەکشەممە و دووشەممە 16 و17-2 -2025 بۆ کاتێکی نادیار دواخرا.