فراکسیۆنی پارتی لە پەرلەمانی عێراق لە کێشەی جووتیارانی کورد دەکۆڵێتەوە

 

ئاڤا نیوز

لەسەر ڕاسپاردەی سەرۆک بارزانی، سبەی شاندێکی فراکسیۆنی پارتی لە پەرلەمانی عێراق سەردانی کەرکووک دەکەن و لە ڕووداوەکانی ئەمڕۆی شەناغە دەکۆڵێتەوە.

وێنە گەورەکە: نیو سەدەیە پشتئەسستوور بە بڕیاری مەجلس قیادە سەورەی ڕژێمی بەعس کە ئێستا لە پەرلەمان هەڵوەشاوەتەوە، لە وەرزی داچاندن و دروێنەدا سوپای عێراق و عەرەبی هاوردە ناهێڵن جووتیارانی کورد زەوییە ڕەسەنەکانیان بەکاربهێنن.

چیرۆکی سەرەکی: بەیانی ڕۆژی دووشەممە، لە گوندی شەناغەی سنووری پردێ لە پارێزگای کەرکووک، سوپای عێراق بۆ ڕێگریکردن لە جووتیاران بۆ كێڵانی زەوییە کشتووکاڵییەکان بەمەبەستی داچاندن هەڵیکوتایە سەریان و ئاڵۆزی لێکەوتەوە.

لێدوانی فەرمی: مەریوان قەرەنی، جێگری سەرۆکی فراکسیۆنی پارتی لە پەرلەمانی عێراق بە ئاڤای گوت، "سبەی سەردانی شەناغە دەکەین و لەگەڵ جووتیاران کۆدەبینەوە، دواتر لەگەڵ فەرماندەی ئۆپەراسیۆنەکانی کەرکووک کۆدەبینەوە، بۆ ئەوەی ڕوون ببێتەوە کە لەسەر چ بنەمایەک ئەوەیان کردووە، چونکە ئەرکی ئەوان پاراستنی سنوورەکانە نەک هەڵکوتانە سەر جووتیاران."

ئەمەش بزانە: سەرۆک مەسعود بارزانی لەسەر ڕووداوەکانی ئەمڕۆی گوندەکانی سەرگەڕان، پەیامی بۆ بەغدا ناردووە، لە پەیامەکەدا هاتووە، "ئەم ڕەفتارانەی بەغدا مایەی قبووڵکردن نین و دژی یاسا و دەستووریشن و دەبێ کۆتاییان پێ بهێنرێت، هەرچی پێویستیش بێت بۆ پاراستنی مافی یاسایی و دەستووری جووتیارانی کورد دەیکەین".