بەفەرمانی سەرۆکوەزیرانی عێراق لیژنەیەکی لێکۆڵینەوە بۆ ڕووداوەکانی کەرکووک پێکدەهێنرێت

ئاڤا نیوز

 

فەرماندەی گشتیی هێزە چەکدارەکانی عێراق فەرمانی کردووە، لیژنەیەکی لێکۆڵینەوە لە ڕووداوەکانی ڕۆژی ڕابردووی شەناغە لە سنووری کەرکووک پێکبهێنرێت. 

 

چی ڕوویدا؟: دوانێوەڕۆی ڕۆژی دووشەممە جووتیارانی گوندی شەناغە لە سنووری کەرکووک سەرقاڵی کێڵانی زەوی زارەکانیان بوون بەمەبەستی داچاندنی گەنم و جۆڵ لەسەر زەوییە کشتوکاڵییەکانی خۆیان، هەر زوو هێزێکی سوپای عێراق هەڵدەکوتێتە سەر ئەو جووتیارانە و دەیەوێت کارەکانیان پێ ڕابگرێت، بەهۆی ئەوەی سوپا توندوتیژی بەکاردەهێنێت، هەر زوو دەنگدانەوە فراوانی بەدوای خۆیدا هێنا. 

 

ڕاگەیێنراوی فەرمی: فەرماندەیی ئۆپراسیۆنە هاوبەشەکانی عێراق لە بەیاننامەیەکدا ڕایگەیاند: 

 

- فەرماندەی ئۆپەراسیۆنە هاوبەشەکان بڕیاریداوە کە لیژنەیەکی لێکۆڵینەوە لەبارەی ڕووداوەکانی دوێنی کەرکووک پێکبهێنرێت. 

- بڕیاردراوە بریکاری وەزارەتی داد سەردانی کەرکووک بکات و ڕێککاری پێویست سەبارەت بە زەوییەکانی ناوچەکانی نێوان هەرێـمی کوردستان و عێراق بگرێتەبەر. 

- ئۆپەراسیۆنە هاوبەشەکان داوا لە سوپا، هێزەکانی ناوخۆ، پێشمەرگە، حەشدی شەعبی و دەزگا ئەمنی و هەواڵگیرییەکان دەکات پابەندی یاسا و فەرمانەکان بن.

- داوا لە هەموو لایەنەکان و هێزە سیاسییەکان دەکەین حکمەت و هێمن و ئارامی بەکاربهێنن و بەرژەوەندییە باڵاکانی نەتەوەیی لە پێشینەیی دابنێن.

زانیاری تایبەت بە ئاڤا میدیا: سەرۆک مەسعود بارزانی لەسەر ڕووداوەکانی دوێنی گوندەکانی سەرگەڕان، پەیامی بۆ بەغدا ناردووە، لە پەیامەکەدا هاتووە، "ئەم ڕەفتارانەی بەغدا مایەی قبووڵکردن نین و دژی یاسا و دەستووریشن و دەبێ کۆتاییان پێ بهێنرێت، هەرچی پێویستیش بێت بۆ پاراستنی مافی یاسایی و دەستووری جووتیارانی کورد دەیکەین".