بۆ هەناردەکردنەوەی نەوتی هەرێمی کوردستان مەسرور بارزانی و شاندێکی تورکیا کۆبوونەوە

ئاڤا نیوز

 

شاندێکی وەزارەتی دەرەوەی تورکیا لە هەرێمی کوردستانن، ئەمڕۆ سەرۆکوەزیران مەسرور بارزانی پێشوازی لەو شاندە کردووە و چوار تەوەریان باسکردووە، یەکێکیان هەناردەکردنەوەی نەوتی هەرێمی کوردستان بووە.

 

ڕاگەیێنراوی فەرمی: سەرۆکوەزیران مەسرور بارزانی ئەمڕۆ سێشەممە پێشوازیکردووە لە بێریس ئیکینجی، جێگری وەزیری دەرەوەی تورکیا بۆ کاروباری وزە و شاندێکی یاوەری، لە کۆبوونەوەکە باسی ئەم تەوەرانە کراون:

 

- پەرەدان بە پەیوەندی و ئاڵوگۆڕی بازرگانی و وزە.

- هاوڕابوون لەسەر پێویستی دەستپێکردنەوەی هەناردەکردنەوەی نەوتی هەرێمی کوردستان لە ڕێگەی بەندەری جەیهان.

- گرنگی بەشداری هەرێمی کوردستان لە پڕۆژەی گەشەپێدان، کە لە ڕێگەی هێڵی ئاسنین، وڵاتانی کەنداو و عێراق بە تورکیا و ئەوروپا دەبەستێتەوە. هەردوولا هاوڕابوون لەسەر بەشداری هەرێمی کوردستان لەو پڕۆژەیە.

- گۆڕانکارییەکانی سووریا و مافی کورد و پێویستی پاراستنی ئاسایش و سەقامگیریی سووریا بەشێکی دیکەی کۆبوونەوەکە بووە.

ئەوەی پێویستە بیزانیت: لە دوێنێوە ئەو شاندەی وەزارەتی دەرەوەی تورکیا لە هەرێمی کوردستانن، ئەمەش وەک قۆناغی ئامادەکاری بۆ هەناردەکردنەوەی نەوتی هەرێمی کوردستان لە ڕێگەی بەندەری جەیهانەوە کە لە 25-3-2023ـەوە ڕاگیراوە.