بڕیاری دەستگیرکردن بۆ عومەر فەقێ دەرچوو

ئاڤا نیوز

 

لەسەر سكاڵای ژمارەیەك ڕێكخراوی بواری جینۆساید،  لەلایەن دادگای كەلارەوە بڕیاری دەستگیركردنی عومەر فەقێ، چالاكوان درا.

 

چیرۆكی سەرەكی: نزیكەی سێ هەفتە پێش ئێستا، عومەر فەقێ كە وەك چالاكوان لە تۆڕە كۆمەڵایەتییەكانی ئینتەرنێت ناسراوە لە دیدارێكی میدیاییدا نزای بۆ سەدام حوسێن، سەرۆكی پێشووتری عێراق كرد، ئەمە كاردانەوەی توندی خەڵك بە گشتی و كەسوكاری شەهیدان و ئەنفالكراوان بەتایبەتی لێكەوتەوە و لە هەولێر و گەرمیان سكاڵای یاسایی لەسەر تۆمار كرا.

 

زانیاریی بەدەستهاتوو: ڕۆژی 4-2-2025، ژمارەیەكی زۆر لە كەسوكاری ئەنفالكراوان و تاقانەكانی ئەنفال و پێنج ڕێكخراوی بواری جینۆساید، لەبەردەم دادگەی كەلار لە گەرمیان گردبوونەوەیەكی ناڕەزاییان لەبەرامبەر قسەكانی عومەر فەقێ ڕێكخست و پاشان لە ڕۆژی 9-2-2025، كۆمەڵەی داكۆكی لە پرسی ئەنفال لەبری هەمووان لە دادگەی كەلار داوای یاسایی لەسەر ناوبراو تۆمار كرد.

 

لێدوانی فەرمی: ئەكرەم ساڵح ڕەشید، سەرۆكی كۆمەڵەی داكۆكی لە پرسی ئەنفال ڕایگەیاند: نیوەڕۆی ئەمڕۆ سێشەممە، 18-2-2025، دادگەی كەلار بڕیاری دەستگیركردنی بۆ عومەر مەحموود فەقێ دەركرد.