لە بەغدا داوا دەکرێت ئینتەرنێتی کۆڕەک تیلیکۆم ڕابگیرێت

ئاڤا نیوز

دەستەی ڕاگەیاندن و پەیوەندییەکانی عێراق فەرمانی بڕینی خزمەتگوزاری ئینتەرنێتی لەسەر کۆمپانیای کۆڕەک تیلیکۆم دەرکرد و داوا لە وەزارەتی پەیوەندییەکان دەکات بڕیارەکە جێبەجێ بکات، کۆمپانیای کۆڕەکیش بڕیارەکە بە "سیاسی" ناو دەبات.

 

ڕاگەیێنراوی فەرمی: بەگوێرەی بڕیارەکەی دەستەی ڕاگەیاندن و پەیوەندییەکانی عێراق، داوا دەکات دەستبەجێ خزمەتگوزاری ئینتەرنێت لەسەر کۆمپانیای کۆڕەک تیلیکۆم ببڕدرێت وەک ڕێکارێکی سزایی لە بەرامبەر کۆمپانیای ناوبراو بەهۆی نەدانی ئەو قەرزانەی کە لەسەری بووە و بەردەوامی سەرپێچیەکانی کە لەدژی تۆمارکراوە.

• 
  -دەستەی ڕاگەیاندن و پەیوەندییەکانی عێراق ئاماژە بۆ ئەوە دەکات بۆ جێبەجێکردنی بڕیارەکە قسەیان لەگەڵ وەزارەتی پەیوەندییەکان کردووە، لەگەڵ ناچارکردنی کۆمپانیای کۆڕەک بۆ قەرەبووکردنەوەی بەشداربووانی بۆ ئەوەی بەشداربووان لە بڕیارەکە زیانمەند نەبن.
  -دەستەکە بەشی دەنگی بەکاربەرانی ڕاسپاردووە بۆ گرتنەبەری ڕێکاری پێویست بۆ وەرگرتنی سکاڵای بەشداربووان لەبارەی پچڕانی خزمەتگوزارییەکان و تۆمارکردنی بەفەرمی لەگەڵ لە ئەستۆگرتنی لەلایەن کۆڕەک لە سەرجەم لێکەوتەکانی پچڕانی ئەو خزمەتگوزارییە.
•  

بۆچوونی لایەنی بەرامبەر: سیروان بارزانی، بەڕێوەبەری گشتیی کۆمپانیای کۆڕەک تیلیکۆم بە ئاڤا میدیای ڕاگەیاند: ئەوەی لە بەرامبەر کۆرەک دەکرێت هەمان ئەو شتەیە کە ئێستا لە سەرگەڕان بەرامبەر بە جووتیارانی کورد دەکرێت و بابەتەکە سیاسییە و ئێمە لەوبارەیەوە نووسراو بۆ دەستەی ڕاگەیاندن و پەیوەندییەکانی عێراق دەکەن.

- بڕیاری بڕینی خزمەتگوزاری ئینتەرنێت لەسەر کۆڕەک و هەرخزمەتگوزارییەکی دیکە لە دەستی دەستەی ڕاگەیاندن و پەیوەندییەکانی عێراق نییە، بەڵکو لە دەستی وەزارەتی پەیوەندییەکانە. ئەگەر هەر بڕیارێکیش لەوبارەیەوە بدرێت کاریگەریی بەسەر پارێزگاکانی هەرێمی کوردستان نابێت.