لە بەردەڕەش دوو هاووڵاتی بەتۆمەتی دزینی گۆڕەری کارەبا دەستگیرکران

ئاڤا نیوز

دوای بە دواداچوونی ئاڤا لەسەر دیاردەی دزینی محاویلە و کێبلی کارەبا لە قەزای بەردەڕەش، دوو هاونیشتیمانی دەستگیرکران. هەردوو هاووڵاتییەکەش خەڵکی ناحیەی ڕۆڤیان لە قەزای بەردەڕەش.

لێدوانی فەرمی: مەنهەل موەفەق، بەڕێوەبەری ناحیەی ڕۆڤیا، بە ئاڤا میدیای ڕاگەیاند: دوای ئەوەی زانیاریمان بەدەست گەیشت کە هەندێک هاونیشتمانی لەسەر زەوی کشتوکاڵی سەرقاڵی دزینی محاویلە و کێبڵی کارەبان، ڕاستەوخۆ ئاسایشمان بۆ شوێنەکە نارد، دوو هاونیشتمانییەکە ئۆتۆمبێلێکی جۆری پیکاپ دێریان لەلا بووە.

زانیاریی زیاتر: هەردوو هاونیشتمانییەکە کە ئاسایشیان بینووە هەڵاتوون، بەڵام ئاسایش دوایانکەوتن و دوای 30 خولەک توانییان هەردوو کەسەکە لە ناحیەی دارەتوو دەستگیر بکەن. دوای دەستگیرکردنیان دەرکەوتووە پێشتر کێبڵ و محاویلەیەکی زۆریان دزیوە.

ئەوەی پێویستە بیزانیت: لە ماوەی دوو مانگی ڕابردوودا، ئەوە چوارەم حاڵەتی دزینی محاویلە و کێبلی کارەبایە لە سنووری قەزای بەردەڕەش ڕووبدات.