موقتەدا سەدر لەبارەی هەڵبژاردنی داهاتوو داوایەک لە لایەنگرانی دەکات

ئاڤا نیوز

 

ڕێبەری ڕەوتی نیشتمانیی شیعە، لەبارەی هەڵبژاردنی داهاتووی ئەنجوومەنی نوێنەرانی عێراق ڕێنمایی لایەنگرانی دەکات هەتا ئەگەر بەشداری هەڵبژاردن بكەن یان بایكۆتی بكەن، وا باشترە تۆماری دەنگدەرانیان نوێ بکەنەوە.

 

وێنە گەورەکە: بڕیارە مانگی 10ی ئەمساڵ هەڵبژاردنی پەرلەمانی عێراق بکرێت، چاوەڕوان دەکرێت ڕکابەرییەکی تووند لە نێوان لایەنە سیاسییەکان هەبێت و گۆڕانکاریش لە نەخشەی سیاسیی ئێستای عێراق ڕووبدات.

 

چیرۆکی سەرەکی: یەکێک لە شوێنکەوتووانی موقتەدا سەدر، ڕێبەری ڕەوتی نیشتمانیی شیعە پرسیاری ئەوەی ئاراستەی سەدر کردووە، بۆچوونی ئەوان چییە لەسەر نوێکردنەوەی تۆماری دەنگدەران، بە تایبەت کۆمیسیۆن وادەیەکی دیاریکردووە بۆ نوێکردنەوەی تۆماری دەنگدەران.

 

بڵاوکراوەی فەرمی: بەگوێرەی بڵاوکراوەیەک کە واژۆی موقتەدا سەدر، ڕێبەری ڕەوتی نیشتمانیی شیعەی لەسەرە، لە وەڵامی ئەو پرسیارە دەڵێت: ئەمە پێویستییەکە و تەنانەت سوودیشی بۆتان هەیە، جا بەشداری هەڵبژاردن بكەن یاخود بایكۆتی بكەن، بۆیە بە دڵنیاییەوە بچن نوێی بکەنەوە.

 

ئەوەی پێویستە بیزانیت: ڕەوتی نیشتمانیی شیعە -پێشتر ڕەوتی سەدر بوو- لە هەڵبژاردنی پەرلەمانی عێراق لە ساڵی 2021 بەشداریی کرد و زۆرترین کورسی لەسەرتاسەری عێراق بەدەستهێنا(73 کورسی)، دواتر بەهۆی ناکۆکییەکانی لەگەڵ لایەنەکانی دیکەی شیعە لەسەر پێکهێنانی حکومەت، لە پەرلەمان و پرۆسەی سیاسی لە ساڵی 2022  کشایەوە.

 

لەلایەکی دیکە: لەبارەی ئەو دەنگۆیانەی کە باس لە خۆتۆمارکردنی ڕەوتی نیشتمانیی شیعە لە کۆمیسیۆن دەکرێت، جومانە غەلای، وتەبێژی کۆمیسیۆنی باڵای هەڵبژاردنەکان بە ئاڤا میدیای ڕاگەیاند: هیچ داوایەکمان لەلایەن ڕەوتی نیشتمانیی شیعە بۆ خۆتۆمارکردن بە مەبەستی بەشداریکردن لە هەڵبژاردنی داهاتووی ئەنجوومەنی نوێنەرانی عێراق پێنەگەیشتووە.