حەسەن دغێم: هەسەدە بانگهێشتی کۆنگرەی نیشتیمانی سووریا ناکرێت

ئاڤا نیوز

وتەبێژی لیژنەی ئامادەکاری کۆنگرەی نیشتیمانی سووریا ڕایگەیاند، هەر هێزێک خۆی هەڵنەوەشێنێتەوە و تێکەڵ بە وەزارەتی بەرگری نەبێت، بانگهێشتی کۆنگرەی نیشتیمانی ناکرێت، جەختیش دەکاتەوە کە هەسەدە بە تەنیا نوێنەرایەتی کورد لە سووریا ناکات.

چیرۆکی سەرەکی: تائێستا وادەی کۆنگرەی نیشتیمانی سووریا دیارینەکراوە، بەڵام وەک باس دەکرێت 1000 کەسایەتی لە سەرانسەری سووریادا بانگهێشتی کۆنگرەکە دەکرێن بۆ گەڵاڵەکردنی نەخشەڕێگای داهاتووی سووریا بۆ قۆناغی ڕاگوزەر و بونیادنانەوەی دامەزراوەکان کە دەوترێت چوار ساڵی پێدەچێت.

لێدوانی فەرمی: حەسەن دغێم، وتەبێژی لیژنەی ئامادەکاری کۆنگرەی نیشتیمانی سووریا بۆ ئاژانسی ئانادۆڵو ڕایگەیاند:

٠ لە کۆنگرەی نیشتیمانی سووریادا یەکێتیی و ئاسایشی سووریا، گفتوگۆ لەسەر دەستووری نوێ، دانانی ڕێکار بۆ قۆناغی ڕاگوزەر، دادگاییکردنی تاوانبارانی جەنگ، چاکسازیی دارایی و خۆشگوزەرانی گەل تاوتوێ دەکرێن.

٠ لیژنەکەمان سەردانی پارێزگاکان دەکات و ڕاستەوخۆ لەگەڵ خەڵک پەیوەندی دەبێت، لە کۆنگرەی سەرکەوتنیشدا لە دیمەشق، هەڵوەشاندنەوەی هەموو گرووپە سەربازییەکان و دانانی ئەحمەد شەرع بە سەرۆکی سووریا ڕاگەیێنرا.

٠ هێزەکانی سووریای دیموکرات لەژێر سەرکردایەتی مەزڵوم عەبدی، بە پێکهاتەیەکی سەربازیی هەژمار دەکرێن کە حکومڕانی بەشێکی سووریا دەکەن و لە دەرەوەی دەسەڵاتی حکومەتی دیمەشقن، تائێستاش نەبوونەتە بەشێک لە دەوڵەتی سووریا.

٠ ئێمە لەگەڵ هەسەدە و هیچ گروپێکی دیکەی سەربازییدا کۆنابینەوە، بەڵکو ڕاستەوخۆ لەگەڵ خەڵک و کەسایەتییەکان و شارەزایان کۆدەبینەوە، هەسەدەش بە تەنیا نوێنەرایەتی کورد ناکات بەڵکو لەناو سوپای ئازادی سووریاشدا چەندین هاووڵاتی کورد هەبوون دژی سوپای ڕژێمی پێشوو.

٠ لیژنەکەمان ئەرکی ئامادەکاری بۆ کۆنگرەی نیشتیمانی لە ئەستۆدایە، بەڵام دەسەڵاتی بڕیار و گفتوگۆی سیاسی نییە، بەڵکو ئەرکمان ڕاوێژە لەگەڵ زۆرترین چین و توێژ لەسەر داهاتووی سووریا.

٠ کۆنگرەی نیشتیمانی هیچ دۆزێک قبووڵ ناکات هەڕەشە بۆ سەر وڵاتانی دراوسێی سووریا دروستبکات.