ترەمپ نامەیەکی دەستنووس بۆ نێچیرڤان بارزانی دەنێرێت

ئاڤا نیوز

 

سەرۆکایەتیی هەرێمی کوردستان ڕایگەیاند، لەلایەن دۆناڵد ترەمپ، سەرۆکی ئەمریکاوە نامەیەک بۆ نێچیرڤان بارزانی نێردراوە و نامەکە دەستنووسە.

 

وێنە گەورەکە: ڕۆژی 20-1-2025 دۆناڵد ترەمپ وەک 47ـەمین سەرۆکی ئەمریکا سوێندی یاسایی خوارد و دەستبەکاربوو، هەر ئەو ڕۆژە، نێچیرڤان بارزانی، بەناوی هەرێمی کوردستانەوە لە هەژماری خۆی لە تۆڕی ئێکس پەیامێکی پیرۆزبایی بەوبۆنەیەوە بڵاوکردەوە.

 

ڕاگەیێنراوی فەرمی: ئەمڕۆ پێنجشەممە، لە وەڵامی نامەیەکی نێچیرڤان بارزانییدا، سەرۆکی ئەمریکا نامەیەکی دەستنووسی ناردووە. لە نامەکەدا ترەمپ، سوپاسی سەرۆکی هەرێمی کوردستانی کردووە، هاوکات جه‌ختى له‌ پێكه‌وه‌كاركردن و هاريكاريى هاوبه‌ش و بره‌ودان به‌ به‌ها هاوبه‌شه‌كان له‌گه‌ڵ هه‌رێمى كوردستاندا كردووه‌ته‌وه‌.

 

زانیاریی زیاتر: لە بەشی کۆتایی نامەکەیدا دۆناڵد ترەمپ، هیوای سەرکەوتن بۆ سەرۆکی هەرێمی کوردستان دەخوازێت.

باکگراوند: 22ـی مانگی یەکی ساڵی 2020 لە کۆڕبەندی داڤۆس، نێچیرڤان بارزانی سەرۆکی هەرێمی کوردستان و دۆناڵد ترەمپ سەرۆکی ئەمریکا کۆبوونەوە، جارێکی دیکە لە ڕۆژی 8-12-2024 نێچیرڤان بارزانی لە مەراسیمی کردنەوەی کاتێدرالی نۆتردام لە پاریس دیدارێکی لەگەڵ دۆناڵد ترەمپ هەبوو.