ئاسایشی هەولێر: دەستگیرکردنی تیکتۆکچییەکانی سلێمانی هەنگاوێکی گرنگە

ئاڤا نیوز 

 

لەماوەی چەند ڕۆژی ڕابردوودا ئاسایشی سلێمانی هەڵمەتێکی دەستگیرکردنی بۆ ئەو کەسانە دەستپێکردووە کە لە تۆڕی کۆمەڵایەتی تیکتۆک لایڤ دەکەنەوە و قسەی نەشیاو و دوور لە بەها کۆمەڵایەتییەکان بڵاودەکەنەوە، ئاسایشی هەولێریش لەوباریەوە دەڵێت،"'ئەم هەنگاوەی ئاسایشی سلێمانی گرنگە و ئەو لاسەنگییە ناهێڵێت کە پێشتر هەبوو''. 

 

وێنە گەورەکە: زیاتر لە ساڵێکە لەلایەن بەڕێوەبەرایەتیی ئاسایشی هەولێرەوە، هەڵمەتێکی ئاگادارکردنەوە و پڕکردنەوەی بەڵێننامە و دادگایکردنی ئەو کەسانە دەستپێکردووە کە لە تۆڕە کۆمەڵایەتییەکان لایڤ دەکەنەوە و قسەی نەشیاو دەکەن، لەماوەی چەند ڕۆژی ڕابردووشدا ئاسایشی سلێمانی دەستی بە هەمان هەڵمەت کردووە. 
 
لێدوانی فەرمی: موقەدەم ئەردەڵان، وتەبێژی بەڕێوەبەرایەتی ئاسایشی هەولێر، بە ئاڤا میدیای ڕاگەیاند: پێشتر لاسەنگییەک هەبوو و لە سنووری هەولێر کۆنترۆڵکرابوو، بەڵام نەمان دەتوانی لێپێچینەوە لەگەڵ ئەو کەسانە بکەین کە لە سنووری چالاکیمان نەبوون، دەشڵیت ''ئەم هەنگاوەی ئاسایشی سلێمانی گرنگە بۆ پاراستنی شیرازەی کۆمەڵایەتیی، بەڵام هێشتا زۆر کەس ماوە دەستگیری بکەن، هیوادارم ئاسایشی دهۆکیش هەمان هەنگاو بیگرێتەبەر، هاوکات حکومەتی عێراقیش دوای ئێمە هەڵمەتی دەستپێکردووە".

 

زانیاریی زیاتر: تا ئێستا لە سنووری پارێزگای هەولێر دەیان کەس کە لایڤیان لە تۆڕەکۆمەڵایەتییەکان دەکردەوە، بۆ لێپێچینەوە و پڕکردنەوەی بەڵێننامە و پەنجەمۆر بانگ کراون، هەروەها دوو کەسی بەناوبانگیش بەهۆی سوکایەتیکردنەوە دراونەتە دادگا و لێپێچینەوەی یاساییان لەگەڵ کراوە.

 

بۆچی گرنگە: ئەم هەنگاوەی ئاسایش کاریگەری لەسەر پاراستنی شیرازەی خێزان و کۆمەڵگە دەبێت، سنوور بۆ ڕەفتار و قسەی نەشیاو دادەنێت بەجۆرێک ڕێکخستنەوەی کۆمەڵگەی لەسەر بنیاد بنرێت.