هۆشیار زێباری: 90%ـی كارەكانی پێكهێنانی كابینەی نوێ تەواو بوون

ئاڤا نیوز

هۆشیار زێباری، ئەندامی دەستەی كارگێڕیی مەكتەبی سیاسیی پارتی دیموكراتی كوردستان و سەرۆكی شاندی دانووستانكاری ئەو حیزبە بۆ پێكهێنانی حكومەت ڕایدەگەیەنێت، "پێكهێنانی كابینەی دەیەمی حكومەتی هەرێمی كوردستان نزیكە و دەتوانم بڵێم 90%ـی كارەكانی پێكهێنانی كابینەی دەیەم تەواوبووە."

وێنە گەورەکە: پارتی و یەکێتی وەک براوەی یەکەم و دووەمی هەڵبژاردنی پەرلەمانی كوردستان لە هەوڵەکانیان بۆ پێکهێنانی کابینەی نوێی حکومەتی هەرێمی کوردستان بەردەوامن، بۆ ئەم مەبەستەش دووجار لە ئاستی باڵا بە دووقۆڵی كۆبوونەتەوە و شاندی تەكنیكی هەردوو حیزبیش چەندین جار كۆبوونەتەوە، جگە لە ئەنجامدانی ژمارەیەك كۆبوونەوە لەگەڵ لایەنە براوەكانی دیكەی هەڵبژاردن.

لێدوانی فەرمی: میدیای فەرمی پارتی دیموكراتی كوردستان ئاماژەی بە لێدوانێكی هۆشیار زێباری، ئەندامی دەستەی كارگێڕیی مەكتەبی سیاسیی ئەو حیزبە داوە،

- بەوەی كە پارتی چەندین كۆبوونەوەی گرنگی لەگەڵ هەموو لایەنە سیاسییە بەشداربووەكانی هەڵبژاردن كردووە، بەبێ ئەوەی ڕەچاوی ژمارەی كورسی لایەنە براوەكان بكات، بەڵام زۆرترین كۆبوونەوە و نزیكبوونەوەی لەگەڵ یەكێتی نیشتمانی كوردستانە.

- "دەتوانم بڵێم 90%ـی كارەكانی پێكهێنانی كابینەی دەیەمی حكومەتمان تێپەڕاندووە و لەسەر نۆ تەوەر ڕێككەوتووین."

- "تاوەکو ئێستا دەرگای گفتوگۆمان بەڕووی هیچ لایەنێك دانەخستووە كە نیازی بەشداریكردن لە حكومەتیان هەبێت، بەڵام بەپێی ئەزموونی ڕابردوومان نزیكبوونەوە و هاوڕاییمان لەگەڵ یەكێتی نیشتمانی كوردستان زیاترە".