فەرمانی دەستگیركردن بۆ عەلی حەمەساڵح دەردەچێت

ئاڤا نیوز

لەسەر باسكردنی قاچاخچێتیی لە خاڵە سنوورییەکانی باشماخ و پەروێزخان، وەرگرتنی سەرانە لە بازگەکان، بردنی موڵكی گشتیی لە سلێمانی و پێدانی كامێرای تۆماركردنی تیژڕۆیی بە كۆمپانیای تایبەت، فەرمانی دەستگیركردن بۆ عەلی حەمەساڵح، پەرلەمانتاری كوردستان و سەرۆكی ڕەوتی هەڵوێست دەرچووە.

چیرۆكی سەرەكی: دادوەرێكی دادگای لێكۆڵینەوەی شارۆچكەی دوكان ماوەی دوو هەفتەیە فەرمانی دەستگیركردنی بۆ عەلی حەمەساڵح، پەرلەمانتار و سەرۆكی ڕەوتی هەڵوێست دەركردووە بە تۆمەتی ئەوەی [ عەلی حەمەساڵح] سكاڵای لە دژی پێدانی كامێراكانی تیژڕۆیی بە کۆمپانیای تایبەت تۆمارکردووە و تۆمەتی بۆ ئیدارەی ئەو دەڤەرە هەڵبەستووە.

 

لێدوانی فەرمی: عەلی حەمە ساڵح، پەرلەمانتار لە خولی نوێی پەرلەمانی كوردستان لە پێگەی فەرمی خۆی لە فەیسبووک ڕایگەیاند، "لەسەر باسكردنی قاچاخچێتی لە دەروازە سنوورییەكانی باشماخ و پەروێزخان، وەرگرتنی سەرانە لە بازگەكان، بردنی موڵكی گشتیی سلێمانی و دژی پێدانی كامێراكانی تیژڕۆیی بە كۆمپانیاكان فەرمانی دەستگیركردنم لەلایەن دادوەرێكی دادگای لێكۆڵینەوەی دووكان دەرچووە، لەكاتێكدا سەرجەم ئەوانەی باسم كردوون 100% نایاسایین".

 

زانیاریی زیاتر: ئەو پەرلەمانتارە بە تەنزەوە نووسیویەتی، "پێدەچێت ئەم دادوەرە بەڕێزە نەزانێت من پارێزبەندیی پەرلەمانیم هەیە، بەو پێیەی فەرمانی دەستگیركردن بۆ پەرلەمانتار بەبێ لابردنی پارێزبەندی كارێكی ناڕەوا و نایاساییە.