ئەنجوومەنی باڵای دادوەری داوای جێبەجێکردنی یاسای لێبوردنی گشتی دەکات

ئاڤا نیوز

سەرۆکی ئەنجوومەنی باڵای دادوەری، داوای لە سەرجەم دادوەرانی دادگاکانی عێراق کرد، یاسای لێبوردنی گشتی جێبەجێ بکەن.

چیرۆکی سەرەکی: ڕۆژی 18-2-2025 هەر سێ یاسای لێبوردنی گشتیی و باری کەسیی و گەڕانەوەی موڵک بۆ خاوەنە ڕەسەنەکانیان لەڕۆژنامەی "وەقائیع" بەفەرمی بڵاوکرایەوە، بەمەش هەرسێ یاساکە کەوتنە بواری جێبەجێکردنەوە.

لێدوانی فەرمی: فایەق زێدان، سەرۆکی ئەنجوومەنی باڵای دادوەری، داوای لە سەرجەم دادوەرانی دادگاکانی عێراق کرد، بڕگەکانی یاسای لێبوردنی گشتی بەپێی ئەو دەقەی کە لەڕۆژنامەی "وەقائیع" بڵاوکراوەتەوە جێبەجێ بکەن.

زانیاریی زیاتر: بەپێی هەمواری یاساکە لێبووردنی گشتی هیچ کەسێک ناگرێتەوە کە  بەپێی ماددەی 4ـی تیرۆر زیندانی کرابێت و تاوانەکەی بووبێتە هۆی کوشتن یان کەمئەندامی هەمیشەیی کەسێکی دیکە، هیچ تۆمەتبارێکیش ناگرێتەوە کە سەر بە ڕێکخراوە تیرۆریستییەکان بێت.

باکگراوند: 21ی مانگی ڕابردوو پەرلەمانی عێراق لە کۆبوونەوەیەکی مشتومڕئامێزدا و بەیەک پاکێج یاسای لێبوردنی گشتی و باری کەسی و گەڕانەوەی موڵک بۆ خاوەنە ڕەسەنەکانیان پەسەند کرد.