ئەمساڵ گەنمی زیاتر لە جووتیارانی هەرێمی كوردستان وەردەگیرێت

ئاڤا نیوز

بڕیارە هەفتەی داهاتوو شاندێکی وەزارەتی کشتوکاڵی حکومەتی هەرێمی کوردستان، سەردانی بەغدا بکەن، وەزیری کشتووکاڵی عێراق بەڵێنیداوە بڕی ئەو گەنمەی لە جوتیارانی هەرێمی کوردستانی وەردەگرێت زیاتر بکات.

بۆچی گرنگە: ساڵی ڕابردوو بڕیاربوو بەغدا ملیۆنێک و 800 هەزار تۆن گەنم وەربگیرێت، بەڵام ڕێژەکەی بۆ  375 هەزار تۆن گەنم کەمکردەوە، بەمەش بڕێکی زۆر گەنمی جووتیارانی هەرێمی کوردستان مایەوە.

لێدوانی فەرمی: عەباس مالیکی، وەزیری کشتوکاڵی عێراق، بەڵێنی داوە دوای پێشکەشکردنی ڕاپۆرتێکی تایبەت لەسەر ژمارەی جووتیاران و ڕووبەری داچێنراو بە گەنم لە هەرێمی کوردستان بە هاوسەنگی بڕی وەرگرتنی گەنم زیاتر بکرێت. زۆزان کۆچەر، جێگری سەرۆکی لیژنەی کشتوکاڵ لە ئەنجوومەنی نوێنەرانی عێراق وای بە ئاڤا نیوز گوت.

ژمارەکان وادەڵێن: بڕی گەنمی وەرگیراو لە ساڵی ڕابردوو بەمشێوەیە بەسەر پارێزگاکاندا دابەشبووە:
سلێمانی: 129 هەزار و 617 تۆن و 780 کیلۆگرام.
هەولێر: 109 هەزار و 785 تۆن و  500 کیلۆگرام.
دهۆک: 52 هەزار و 195 تۆن و 100 کیلۆگرام.