سبەی وەزیری دەرەوەی سووریا سەردانی بەغدا دەکات

ئاڤا نیوز

بڕیارە ڕۆژی شەممە، وەزیری دەرەوەی سووریا سەردانی بەغدای پایتەخت بکات و لەگەڵ هەریەکە لە  لەتیف ڕەشید و سوودانی و فوئاد حوسێن کۆببێتەوە.

وێنە گەورەکە: ئەسعەد شەیبانی، وەزیری دەرەوەی سووریا لە لووتكەی جیهانیی حكومەتەكان بۆ ساڵی 2025 لە دوبەی بەشداریی کرد و لە گفتوگۆیەکی لەگەڵ ڕۆژنامەی "قەبەس"ی کوێتی ئاشکرای کرد، لە ڕۆژانی داهاتوودا سەردانی عێراق دەکات.

زانیاریی بەدەستهاتوو: بەگوێرەی سەرچاوەیەکی عێراقی، شەیبانی لەگەڵ لەتیف ڕەشید، سەرۆککۆماری عێراق و محەممەد شیاع سوودانی، سەرۆکوەزیرانی عێراق و فوئاد حوسێن، هاوتا عێراقییەکەی لەسەر چەند پرسێکی پەیوەست بە پەرەسەندنی پەیوەندییەکانی نێوان هەردوو وڵات کۆدەبێتەوە، بەتایبەتی لەبوارەکانی ئاسایش و بەرەنگاربوونەوەی تیرۆر و پاراستنی سنوور و کردنەوەی دەروازە فەرمییەکان.

باکگراوند: هەفتەی ڕابردوو فوئاد حوسێن  ئاشکرای کرد بانگهێشتی فەرمیی ئەسعەد شەیبانی کردووە بۆ ئەوەی سەردانی بەغدا بکات، لەبەرامبەردا شەیبانی جەختی کردەوە کە بانگهێشتی فەرمی لەلایەن عێراقەوە پێگەیشتووە و بەمزووانە سەردانی بەغدا دەکات.