سوودانی: عێراق هەنگاوی گەورەی لە گەشەپێدان و ئاوەدانکردنەوە بڕیوە

ئاڤا نیوز

 

لەمیانی وتارێکدا لە حەوتەمین خولی کۆنفرانسی دیالۆگی نێودەوڵەتی، سەرۆکوەزیرانی عێراق ڕایگەیاند، لەماوەی ڕابردوودا پڕۆژەی ستراتیژی گەورەمان جێبەجێ کردووە، دیارترینیان: رێگای گەشەپێدانە.

 

چیرۆکی سەرەکی: بەسەرپەرشتی محەممەد شیاع سوودانی، سەرۆکوەزیرانی عێراق و بەئامادەبوونی نێچیرڤان بارزانی سەرۆکی هەرێمی کوردستان، پەیمانگای عێراقی بۆ دیالۆگ میوانداری حەوتەمین خولی کۆنفرانسی دیالۆگی نێودەوڵەتی لە بەغدای پایتەخت دەکات، بە بەشداریی چەندین کەسایەتی ناودار لەسەر ئاستی بیرکردنەوە و خوێندن و زانکۆ بەناوبانگەکان لە 22 وڵات.

 

لێدوانی فەرمی: محەممەد شیاع سوودانی، سەرۆکوەزیرانی عێراق ڕایگەیاند: ئەو گفتوگۆیانەی لەچوارچێوەی ئەم کۆنفرانسە دەکرێت، گرنگە بۆ دەربڕینی بیروڕای جیاواز لەژێر چەتری دەستوردا کەڕەنگە لەبەرژەوەندیی گشتی بێت و دەسەڵاتی بڕیاردان بیری لێنەکردبێتەوە.

 

زانیاریی زیاتر: سوودانی ئاماژەی بۆ ئەوە کرد، عێراق هەنگاوی گەورەی لە ڕێڕەوی گەشەپێدان و ئاوەدانکردنەوەدا بڕیوە و دەرفەتی دواخستن و ڕاگرتن لەم بوارەدا بەهیچ شێوەیەک نادرێت.

 

لەلایەکی دیکە: پەیوەست بە ڕێگەی گەشەپێدان، سەرۆکوەزیرانی عێراق گوتی، "لە ماوەی ڕابردوودا پڕۆژەی ستراتیژی گەورەمان جێبەجێ کردووە، دیارترینیان ڕێگای گەشەپێدانە ئەویش پڕۆژەیەکی زەبەلاحە و دەرفەتێکە بۆ یەکگرتنی بەرژەوەندی هاوبەش لەگەڵ وڵاتانی دراوسێ و ناوچەکە، هاوکات پێگەی مێژوویی و ئابووری و کولتووری عێراق لەنێو وڵاتانی جیهان و ناوچەکەدا بەرز دەکاتەوە.

 

ئەمەش بزانە: "سەرکەوتوو بووین لە دەستپێکردن و هاندانی وتووێژەکانی نێوان ئەو وڵاتانەی نزیکن  لە گۆڕەپانی  عێراقەوە، دیارترینیان گفتوگۆی نێوان سعودیە و ئێران بوو کەبەشێوەیەکی باش و چالاکانە بەڕێوەچوو".

 

ئەوەی پێویستە بیزانیت: لە بەشێکی دیکەی وتەکانیدا، سوودانی تیشکی خستەسەر کۆتاییهێنان بە ئەرکی هاوپەیمانی نێودەوڵەتی کە وەک خۆی دەڵێت، "ئەرکی هاوپەیمانی نێودەوڵەتیمان بۆ بەرەنگاربوونەوەی داعش لە ڕێگەی گفتوگۆی بەرپرسیارانەوە کۆتاییپێهێنا و چووینە قۆناغێکی نوێی پەیوەندییە دووقۆڵییەکان و هەماهەنگی ئەمنی لەگەڵ ئەو وڵاتانەی کە بەشدارییان لەو هاوپەیمانییەدا کردووە  بەتایبەتی ئەمریکا".