عێراق و ئێران لەبارەی بەرەنگاربوونەوەی مادە هۆشبەرەکان کۆدەبنەوە

ئاڤا نیوز

هەردوو وەزیرانی ناوخۆی عێراق و ئێران پرسی سنووری هاوبەش، بەرەنگاربوونەوەی ماددەکانی هۆشبەر و چەندین پرسی دیکە تاوتوێ دەکەن.

وێنە گەورەکە: عەبدولئەمیر شەمەری، وەزیری ناوخۆی عێراق و ئەسکەندەر موئمینی، هاوتا ئێرانییەکەی بە ئامادەبوونی بەرپرسانی ئەمنی هەردوو وڵات، لە بەغدا لەبارەی چەند پرسێک کۆبوونەوە.

ڕاگەیێنراوی فەرمی: وەزارەتی ناوخۆی عێراق لەبەیاننامەیەکدا ڕایگەیاند:

- لە دیدارەکەدا باس لە ئاسایشی سنووری نێوان هەردوولا، هاوکاری لە بواری بەرەنگاربوونەوەی ماددەی هۆشبەر و کارتێکەرە دەروونییەکان و تاوانە ڕێکخراوەکان کرا.

- باس لە ئامادەکارییەکان بۆ پێشوازیکردن لە سەردانکەرانی "ئەربەعینییە" کرا.

- تاوتوێی ڕێککەوتنی واژۆکراو لەسەر دانپێدانانی یەکتر بە مۆڵەتی شۆفێری بۆ دانیشتوانی هەردوو وڵات، و بابەتەکانی دیکەی پەیوەست بە بوارە ئەمنییەکان کرا.

ئەوەی پێویستە بیزانیت: عێراق بووەتە گۆڕەپانی بازرگانانی ماددەکانی هۆشبەر، بەڕێوەبەرایەتی گشتیی کاروباری ماددە هۆشبەرەکان لە عێراق، 14 هەزار بازرگان و هەڵگری ماددەی هۆشبەریان لەساڵی 2024 ـدا دەستگیرکردووە، هاوکات دەست بەسەر شەش تۆن ماددەی هۆشبەریشدا گیراوە.

ئەمەش بزانە: دەسەڵاتی دادوەری عێراق سزای لەسێدارەدانی بەسەر 144 بازرگانی نێودەوڵەتیی ماددەی هۆشبەر و سزای زیندانی هەتاهەتایی بەسەر 434 بازرگانی ناوخۆییدا لەو ساڵەدا سەپاندووە.