هەژماری من کەرتی تایبەتیش دەگرێتەوە

ئاڤا  نیوز

 

هەرێمی کوردستان هەنگاوێکی ئەرێنی بە ئاڕاستەی فراوانکردنی ژێرخانی دیجیتاڵی دەنێت و کار لەسەر ئەوە دەکرێت، کە فەرمانبەرانی کەرتی تایبەت هاوشێوەی فەرمانبەرانی کەرتی گشتیی هەژماری بانکیان هەبێت و لەڕێگەی ئامێرەکانی ATM  پارەکانیان وەرگرن.

 

وێنە گەورەکە: بە ئامانجی هێنانەکایەی ئاسانکاریی زیاتر بۆ هاووڵاتییانی هەرێمی کوردستان، حکومەت بەردەوامە لە پتەوکردنی ژێرخانی بە دیجتاڵیکردن و لەو چوارچێوەیەشدا دەیەوێت سەرجەم مووچەخۆران لە ڕێگەی هەژماری منەوە مووچەکانیان وەربگرن و تا ئێستا پرۆسەکە لەکەرتی گشتیی بەردەوامە و دوای ئەوە کەرتی تایبەتیش دەگرێتەوە.

 

زانیاریی بەدەستهاتوو: ئاڤا لە سەرچاوەیەکی تایبەتەوە زانیویەتی، "ئامادەکاریی پێویست بۆ ئەوە کراوە فەرمانبەرانی کەرتی تایبەتیش لەنێو پڕۆژەی هەژماری من تۆماربکرێن و کارتی بانکیان هەبێت، دوای ئەوەی فەرمانبەرانی کەرتی گشتیی بەڕێژەیەکی زۆر باش تۆمارکران دەست بەوانەی کەرتی تایبەتیش دەکرێت."

 
زانیاریی زیاتر: کار لەسەر ئەوەش دەکرێت ئامێری پارەدان (POS) زیاد بکات لە فەرمانگە حکومییەکان، فرۆشتگا، بەنزینخانە  دەرمانخانە، بۆ ئەوەی ئاڵوگۆڕی کاش کەمتر بێتەوە و کارتی بانکی تەنیا بۆ ڕاکێشانی پارە نابێت، بەڵکو دەبێتە هۆکارێکیش بۆ نەهێشتنی پارەی کاش.

 

ژمارەکان وادەڵێن: بەگوێرەی دوایین داتای تیمی هەژماری من، 720 هەزار فەرمانبەر خۆیان لە نێو پرۆسەکە تۆمارکردووە و 370 هەزاریان کارتیان وەرگرتۆتەوە، بۆ مووچەی مانگی یەک 275 هەزار فەرمانبەر و خانەنشین لە ڕێگەیەوە مووچەکانیان وەرگرت.