برازایەکی ئوسامە نوجێفی حیزبێکی نوێ دادەمەزرێنێت

ئاڤا نیوز

 

عەبدوڵڵا ئەسیل نوجێفی، کوڕی پارێزگاری پێشووتری نەینەوا و برازای ئوسامە نوجێفی, سەرۆکی پێشووتری پەرلەمانی عێراق حیزبێکی نوێی دامەزراند و بەشداریی هەڵبژاردنی داهاتووی پەرلەمانیش دەکات.

 

چیرۆکی سەرەکی: حیزبە تازەکە ناوی "ڕێبازی نیشتمانی" دەبێت و عەبدوڵڵا ئەسیل نوجێفی خۆی وەکو ئەمینداری گشتیی حیزبەکە ناساند.

 

زانیاریی زیاتر: کۆتایی هەفتەی ڕابردوو، ئوسامە نوجێفی، ئەمینداری گشتیی حیزبی "یەکگرتوو"، هاوپەیمانیی خۆی لەگەڵ پارتی عەزم بە سەرۆکایەتیی موسەننا سەمەڕائی بۆ بەشداریکردن لە هەڵبژاردنەکانی داهاتوو ڕاگەیاند.

 

ئەوەی پێویستە بیزانیت: مانگی 10ی ئەمساڵ تەمەنی خولی ئێستای پەرلەمانی عێراق تەواو دەبێت، بەگوێرەی یاسا، 45 ڕۆژ پێش كۆتاییهاتنی تەمەنی ئەم خولەی ئێستای پەرلەمان، وادەی بەڕێوەچوونی هەڵبژاردن دیاری دەكرێت.