ئیسرائیل پڕۆسەی ئازادکردنی زیندانیانی فەلەستین ڕادەگرێت

ئاڤا نیوز

 

سەرۆکوەزیرانی ئیسرائیل ڕایگەیاند، ئازادکردنی زیندانیکراوانی فەلەستین بۆ کاتێکی نادیار ڕادەگرین تاوەکو حەماس کۆتایی بە " مەراسیمەکانی سووکایەتی" بهێنێت. 

 

چیرۆکی سەرەکی: بزووتنەوەی حەماس ڕۆژی شەممە، حەوت بارمتەی ئیسرائیلیی لە گەڕی حەوتەمی ئاڵوگۆڕکردنی بارمتە و زیندانییەکانی نێوان حەماس و ئیسرائیل ئازاد کرد، هاوکات بڕیاربوو ئیسرائیل 602 زیندانی فەلەستینی ئازاد بکات بەڵام بەهۆی مەراسیمەکانی ئازادکردنی ئەو بارمتانە لەلایەن حەماسەوە ئیسرائیل بڕیاریدا زیندانییەکان  تا کاتێکی نادیار ئازاد نەکات.
 
 ڕاگەیێنراوی فەرمی: ڕۆژی یەکشەممە، نووسینگەی بنیامین نەتانیاهۆ، سەرۆکوەزیرانی ئیسرائیل ڕایگەیاند: لەبەر ڕۆشنایی پێشێلکارییە دووبارەبووەکانی حەماس، لەنێویاندا ئەو ڕێوڕەسمە شەرمەزارکەرانەی بەرامبەر ئازادکردنی بارمتەکان دەیکەن، هەر بۆیە ئازادکردنی فەلەستینییەکان ڕادەگرین. 

 

لەلایەکی دیکەوە: ڕۆژی شەممە، بزووتنەوەی حەماس ڕایگەیاند، دواکەوتنی ئیسرائیل لە ئازادکردنی سەدان زیندانی فەلەستینی دوای ئەوەی پێشتر شەش بارمتەی ئیسرائیلی ئازاد کران، "پێشێلکارییەکی ئاشکرا"ی ڕێککەوتننامەی ئاگربەستە لە غەززە.

 

ئەوەی پێویستە بیزانیت: لە 19-01-2025 قۆناغی یەکەمی ڕێککەوتنی ئاگربەستی غەززە کەوتە بواری جێبەجێکردن، کە 42 ڕۆژ دەخایەنێت، تاوەکو ئێستا هەزار و 100 زیندانیی فەڵەستینی لە کۆی هەزار و 900 زیندانی ئازادکراون، لەبەرامبەردا 29 بارمتەی ئیسرائیل لەکۆی 33 بارمتە ئازادکراون کە چواریان بە مردوویی ڕادەستی وڵاتەکەیان کراونەتەوە.