وەزارەتی پلاندانانی عێراق: وردەکاریی بەشێک لە ئاماری کەرکووک و ناوچەکانی مادەی 140 ڕاناگەیەنرێت

ئاڤا نیوز

وردەکاریی لە ئامارەکانی پارێزگای کەرکووک و ناوچەکانی مادەی 140 لەگەڵ ئەنجامی کۆتایی پرۆسەی سەرژمێریی دانیشتوان ڕاناگەینرێت و تا کاتێکی دیکە دوا دەخرێت.

چیرۆکی سەرەکی: سبەی دووشەممە، کاتژمێر 09:30ـی بەیانی بەئامادەبوونی وەزیری پلاندانانی عێراق و ژمارەیەک وەزیری دیکەی حکومەتی فیدراڵ و نوێنەری حکومەتی هەرێمی کوردستان و نێردەی نەتەوەیەکگرتوەکان ئەنجامی سەرژمێری گشتی لە بەغدا ڕادەگەیەنرێت.

لێدوانی فەرمی: عەبدولزەهرە هنداوی، وتەبێژی وەزارەتی پلاندانانی عێراق بە ئاڤا میدیای ڕاگەیاند:

٠ بەپێی سەرژمێرییەکە ژمارەی دانیشتوانی عێراق دەبێتە 45 ملیۆن 407 هەزار هاووڵاتی، بەدەر لە ژمارەی بیانییەکان کە ژمارەیان نزیکەی 650 هەزار کەسە.

٠ وردەکاری بەشێک لە ئاماری کەرکوک و ناوچەکانی مادەی 140 ڕاناگەیەنرێت، تاوەکو ئێستا تیمەکان بەپێی بڕیاری ئەنجومەنی وەزیرانی عێراق سەرقاڵی بەراوردکارین بەپێی ئاماری 1957 و لەکاتێکی دیکەدا ئەو ئەنجامانەش ڕادەگەیەنرێت.

٠ کۆمیسۆنی هەڵبژاردنەکان دەتوانێت سوود لە داتاکانی سەرژمێری وەربگرێت بۆ هەڵبژاردنی داهاتووی پەرلەمان.

٠ ڕێژەی هەژاری لە عێراق دابەزیوە بۆ 14%.

باکگراوند: لە 2024-11-20، پرۆسەی سەرژمێریی گشتیی دانیشتوان لە هەرێـمی کوردستان و عێراق بەڕێوەچوو.