لە بەغدا کەسێک دەستگیر دەکرێت کە بۆ پارە "خۆی هەڵداوەتە" بەردەم ئۆتۆمبێلی هاووڵاتیان

ئاڤا نیوز

 

پۆلیسی بەغدا دەڵێت، کەسێکیان دەستگیرکردووە کە بۆ پارە "خۆی هەڵداوەتە" بەردەم ئۆتۆمبێلی هاووڵاتیان و دواتریش بۆ لێخۆشبوون لە خاوەن ئۆتۆمبێلەکە، داوای پارەی کردووە.

 

چیرۆکی سەرەکی: وەک پۆلیسی بەغدا ئاشکرای کردووە باندی تاوانکاریی لەسەر ئەم بابەتە دروستبوون، کە ئەندامەکانیان خۆیان فڕی دەدەنە بەردەم ئۆتۆمبێلی هاووڵاتیان، دواتریش داوای پارەی خوێن دەکەن ئەگەر کەسەکەش پارە نەدات هەڕەشەی لێدەکەن.

 

ڕاگەیێنراوی فەرمی:  پۆلیسی بەغدا دەڵێت، تۆمەتبارەکە دوای ئەوەی خۆی فڕێداوەتە بەردەم ئۆتۆمبێلی هاووڵاتیی خۆی وەک بریندار نیشان داوە کاتێک خاوەن ئۆتۆمبێلەکەش دەیبات بۆ نەخۆشخانە، تۆمەتبار داوای پارەی خوێنی برینداربوون لە خاوەن ئۆتۆمبێلەکە دەکات.

 

زانیاریی زیاتر: کاری ئەو جۆرە کەسانە ئەوەیە، ئەگەر خاوەن ئۆتۆمبێلەکە ڕەتیبکاتەوە پارەی پێبدات، تۆمەتبار هەڕەشەی لێدەکات کە بە ڕێگەی کۆمەڵایەتیی و عەشائیریی پارەکەی لێ دەسەنێت، پۆلیسی بەغدا جەختی کردووەتەوە کە ئەو تۆمەتبارە دەستگیرکراوە و دانی بە تاوانەکەیدا ناوە، ڕێکاری یاسایشی لە دژ گیراوەتەبەر.